ଚାଷୀଙ୍କ ଶସ୍ୟ ବୀମା ସମୟ ବୃଦ୍ଧି ପାଇଁ ବିଜେପି ପକ୍ଷରୁ ଜିଲାପାଳଙ୍କୁ ଦାବିପତ୍ର ପ୍ରଦାନ

ବୌଦ୍ଧ : କରୋନା କଟକଣା ଭିତରେ ଚଳିତବର୍ଷ କୃଷକ ସମାଜ ବହୁ ଭାବରେ ପ୍ରଭାବିତ ହୋଇଛି। ବାରମ୍ବାର ଲକଡାଉନ ଓ ସଟଡାଉନ ପରିସ୍ଥିତିରେ ଜିଲାସାରା ଗମନା ଗମନର ବ୍ୟବସ୍ଥା ବିପର୍ଯ୍ୟସ୍ଥ ହୋଇପଡିଛି। ଫଳରେ ଚାଷୀମାନେ ଠିକ ସମୟରେ ବ୍ୟାଙ୍କ ଓ ପେକ୍ସ ମାନଙ୍କୁ ପହଞ୍ଚି ନପାରି ଋଣ ପାଇବାରୁ ବଞ୍ଚିତ ହୋଇଛନ୍ତି। ଏହି ଘଡସନ୍ଧି ସମୟରେ ଚାଷୀମାନେ ଗୃହବନ୍ଦୀ ହୋଇ ରହିବା ସହିତ ଶସ୍ୟବୀମା କରିବାରୁ ମଧ୍ୟ ବଞ୍ଚିତ ହୋଇଛନ୍ତି। ସୂଚନା ମୁତାବକ ପ୍ରଧାନମନ୍ତ୍ରୀ ଶସ୍ୟ ବୀମା ପାଇଁ ଶେଷ ତାରିଖ ଜୁଲାଇ ୩୧ ତାରିଖ ଥିବାବେଳେ କୃଷିଭିତ୍ତିକ ବୌଦ୍ଧଜିଲ୍ଲାର ବହୁ ସଂଖ୍ୟାରେ ଚାଷୀ ବୀମା କରିପାରିନାହାନ୍ତି। ତେଣୁ ଚାଷୀମାନଙ୍କୁ ଶସ୍ୟବୀମାଭୁକ୍ତ କରିବା ପାଇଁ ସମୟ ଅଗଷ୍ଟ ୩୧ ତାରିଖ ପର୍ଯ୍ୟନ୍ତ ସମୟ ଦେବାକୁ ବିଜେପି କୃଷକ ମୋର୍ଚ୍ଚା ପକ୍ଷରୁ ଜିଲାପାଳଙ୍କୁ ଏକ ଦାବୀପତ୍ର ପ୍ରଦାନ କରାଯାଇଛି। ରାଜ୍ୟ କୃଷକ ମୋର୍ଚ୍ଚାର ଉପସଭାପତି ସୂର୍ଯ୍ୟ ନାରାୟଣ ମହାପାତ୍ରଙ୍କ ନେତୃତ୍ୱରେ ଜିଲା ବିଜେପି ସଭାପତି ବିପ୍ରଚରଣ ମହାନ୍ତି, ପୂର୍ବତନ ଜିଲା ସଭାପତି ମନୋରଂଜନ ଦାଶ, ଯୁବନେତା ଅଟଳ କୁମାର ପ୍ରଧାନ , ସତ୍ୟାନନ୍ଦ ପାଣ୍ଡେ ଓ ପ୍ରେମାନନ୍ଦ ମିଶ୍ର ପ୍ରମୁଖ ଜିଲାପାଳଙ୍କୁ ଭେଟି ଏହି ଦାବିପତ୍ର ପ୍ରଦାନ କରିଛନ୍ତି।