ରାଞ୍ଚି: ଝାଡଖଣ୍ଡରେ ଧାନବାଦ ଡିଭିଜନରେ ରେଳଧାରଣାରେ ଏକ ବୋମା ବିସ୍ଫୋରଣ ଘଟଣା ଘଟିଛି । ଗରୱା ଏବଂ ବରକାନା ସେକ୍ସନ ମଧ୍ୟବର୍ତ୍ତୀ ଅଞ୍ଚଳରେ ଶନିବାର ପ୍ରତ୍ୟୁଷରେ ଏହି ବିସ୍ଫୋରଣ ଘଟିଥିବା ଜଣାଯାଇଛି । ବିସ୍ଫୋରଣ ଫଳରେ ଏକ ଡିଜେଲ ରେଳ ଇଞ୍ଜିନ ଲାଇନଚ୍ୟୁତ ହୋଇଥିବା ଜଣାଯାଇଛି । ତେବେ ଏଥିରେ କେହି ମୃତାହତ ହୋଇନାହାନ୍ତି । ବିଶ୍ୱସ୍ତ ସୂତ୍ର ଅନୁଯାୟୀ ରେଳ ଧାରଣା ଉଡାଇ ଦେବାକୁ ନକ୍ସଲମାନେ ଏହି ବୋମା ଖଞ୍ଜିଥିଲେ । ବିସ୍ଫୋରଣ ଖବର ମିଳିବା ପରେ ରେଳବାଇର ବରିଷ୍ଠ ଅଧିକାରୀ ଏବଂ ରେଳ ସୁରକ୍ଷା ବାହିନୀ ଯବାନମାନେ ଘଟଣାସ୍ଥଳରେ ପହଞ୍ଚିଛନ୍ତି । ନଷ୍ଟ ହୋଇଯାଇଥିବା ରେଳ ଧାରଣାର ଯୁଦ୍ଧକାଳୀନ ଭିତ୍ତିରେ ମରାମତି ଆରମ୍ଭ ହୋଇଛି । ଏହି ବିସ୍ଫୋରଣ ଫଳରେ ରାଉରକେଲା-ଟାଟା ନଗର ମଧ୍ୟରେ ରେଳ ଚଳାଚଳ ବାଧାପ୍ରାପ୍ତ ହୋଇଛି । ବିଭିନ୍ନ ସ୍ଥାନରେ ବହୁ ଦୂରଗାମୀ ଯାତ୍ରୀ ଓ ମାଲବାହୀ ଟ୍ରେନ ଅଟକି ରହିଛି ।
Comments are closed.