ନୂଆଦିଲ୍ଲୀ : ୨୦୧୯ ଲୋକସଭା ନିର୍ବାଚନ ପାଇଁ ବିଜେପି ନୂଆ ଧରଣର ଅଭିଯାନ ଆରମ୍ଭ କରିଛି । ୧୦ କୋଟି ସାଧାରଣ ଜନତାଙ୍କ ମତାମତରେ ପ୍ରସ୍ତୁତ ହେବ ବିଜେପି ସଂକଳ୍ପ ପତ୍ର । ଏଥିପାଇଁ ବିଜେପିର କାର୍ଯ୍ୟକର୍ତ୍ତା ଆସନ୍ତା ଏକ ମାସ ମଧ୍ୟରେ ଲୋକମାନଙ୍କ ଘରକୁ ଯାଇ ସେମାନଙ୍କର ମତାମତ ସଂଗ୍ରହ କରିବେ।
ବିଜେପି ଅଧ୍ୟକ୍ଷ ଅମିତ ଶାହା ଏ ସଂପର୍କରେ ସୂଚନା ଦେଇ କହିଛନ୍ତି କି, ଦେଶରେ ସାଧାରଣ ନିର୍ବାଚନର ବାତାବରଣ ସୃଷ୍ଟି ହୋଇଛି। କେଉଁ ବ୍ୟକ୍ତି ଏବଂ ଦଳ ହାତରେ ଶାସନ ଭାର ରହିବ ତାହା ଦେଶର ଜନତା ନିର୍ଦ୍ଧାରଣ କରୁଛନ୍ତି । ‘ଭାରତର ମନ କି ବାତ, ମୋଦୀ କେ ସାଥ’ ବିଷୟରେ ଶ୍ରୀ ଶାହା କହିଛନ୍ତି ଯେ, ସଂକଳ୍ପ ପତ୍ରକୁ ଜନ ଆଧାରିତ କରାଯାଇଛି । ଭିନ୍ନ-ଭିନ୍ନ ଉପାୟରେ ଆମେ ଲୋକଙ୍କ ସହ ସମ୍ପର୍କ କରିବାକୁ ଚାହୁଁଛୁ । ୧୦ କୋଟି ଲୋକଙ୍କ ସହ ଆମ କାର୍ଯ୍ୟକର୍ତ୍ତା ସମ୍ପର୍କ କରିବେ । ସେମାନଙ୍କଠାରୁ ମତାମତ ପାଇବା ପରେ ବିଜେପି ନିଜର ସଂକଳ୍ପ ପତ୍ର ପ୍ରକାଶ କରିବ । ଦେଶକୁ ସୁରକ୍ଷିତ ରଖିବା, ଦାରିଦ୍ର୍ୟ ଉପରକୁ ଉଠିବା ପାଇଁ ଏହି କାର୍ଯ୍ୟକ୍ରମ କରାଯିବ । ଏହା ଦ୍ୱାରା ଏକ ନୂତନ ଭାରତର ନିର୍ମାଣ ହେବ ।
ଶ୍ରୀ ଶାହା କହିଛନ୍ତି କି, ଲୋକମାନଙ୍କ ପାଖକୁ ୩୦୦ ରଥ, ୭୭୦୦ମତ ପେଟି ଯିବ । ପ୍ରତି ରାଜ୍ୟକୁ ୨୦ ଲୋକଙ୍କ ଏକ ଦଳ ପଠାଯିବ । ସେହି ମତାମତ ଆଧାରରେ ସଂକଳ୍ପ ପତ୍ର ପ୍ରସ୍ତୁତ ହେବ । ଅନ୍ୟ ପକ୍ଷରେ ଏହି କାର୍ଯ୍ୟକ୍ରମରେ ଗୃହମନ୍ତ୍ରୀ ରାଜନାଥ ସିଂହ କହିଛନ୍ତି କି, ଜନଭାଗିଦାରୀ ଦ୍ୱାରା ଲୋକତନ୍ତ୍ର ମଜବୁତ ହେବ । ଦେଶରେ ପ୍ରଥମ ଥର ପାଇଁ ଏଭଳି ହେବାକୁ ଯାଉଛି । ପୂର୍ବରୁ ନିଜର ସଂକଳ୍ପ ପତ୍ର ପ୍ରସ୍ତୁତ କରିବା ପାଇଁ କୌଣସି ରାଜନୈତିକ ଦଳ ଏଭଳି ପ୍ରୟାସ କରି ନ ଥିଲେ।
