ବାଲିଆପାଳରେ ବିଜେପିର ନିର୍ବାଚନୀ ସଭା

ବାଲିଆପାଳ- ବସ୍ତା ନିର୍ବାଚନ ମଣ୍ଡଳୀ ଅନ୍ତର୍ଗତ ବାଲିଆପାଳ ବ୍ଲକ ବାଲିଆପାଳ ପଂଚାୟତ ସମ୍ମୁଖରେ ଥିବା ସରକାରୀ ବସଷ୍ଟାଣ୍ଡ ନିକଟରେ ଭାରତୀୟ ଜନତା ପାର୍ଟି ପକ୍ଷରୁ ଏକ ବିରାଟ ସାଧାରଣ ସଭା ଅନୁଷ୍ଠିତ ହୋଇଯାଇଛି । ଏହି ସଭାରେ ଓଡିଆ ଚଳଚିତ୍ର ସୁପରଷ୍ଟାର ତଥା କେନ୍ଦ୍ରାପଡା ସାଂସଦ ଅନୁଭବ ମହାନ୍ତି ଯୋଗ ଦେବାର କାର୍ୟ୍ୟକ୍ରମ ସ୍ଥିର ହୋଇଥିଲା । ଅନୁଭବ ଭୋଗରାଇରୁ ନିର୍ବାଚନୀ ସଭା ସାରି ବାଲିଆପାଳ ବ୍ଲକ ଶାରୀରିକ କ୍ରୀଡା ମହାବିଦ୍ୟାଳୟ ପରିସରରେ ଥିବା ହେଲିପେଡରେ ଓହ୍ଲାଇଥିଲେ । ମାତ୍ର ସଭା ମଂଚକୁ ନ ଯାଇ ତତକ୍ଷଣାତ୍ ସେହିଠାରୁ ଫେରିଯାଇଥିଲେ । ପ୍ରଶାସନିକ ସ୍ତରରେ କୌଣସି ସୁରକ୍ଷା ମଧ୍ୟ ନ ଥିଲା । ସାଂସଦ ଶ୍ରୀ ମହାନ୍ତିଙ୍କୁ ଦେଖିବା ପାଇଁ ହଜାର ହଜାର ଲୋକ ଏଖାଠି ହୋଇଥିଲେ । ତେବେ ସାଂସଦ ଶ୍ରୀ ମହାନ୍ତି ଫେରିଯିବାରୁ ଉପସ୍ଥିତ ଲୋକ ନିରାଶ ହୋଇଥିଲେ ।
ଏହାପରେ ସଭା କାର୍ୟ୍ୟ ଆରମ୍ଭ ହେବାରୁ ବିଧାୟକ ପ୍ରାର୍ଥୀ ରବୀନ୍ଦ୍ର ଅଣ୍ଡିଆ ,ବସ୍ତା ନିର୍ବାଚନ ମଣ୍ଡଳୀ ଭାରତୀୟ ଜନତା ପାର୍ଟି ନିର୍ବାଚନ ପ୍ରଚାର କମିଟି ଅଧ୍ୟକ୍ଷ ଶ୍ୟାମପ୍ରସାଦ ବେହେରା,ପୂର୍ବତନ ଜିଲାପରିଷଦ ଅଜୟ କୁମାର ସାହୁ, ଶିବଶଙ୍କର ପ୍ରଧାନ,ପୂର୍ବତନ ଜିଲାପରିଷଦ ସଦସ୍ୟା ଜୟଲକ୍ଷ୍ମୀ ଅଣ୍ଡିଆ, ସଞ୍ଜୀବ ପାଢୀ, ଟିଭି ଧାରବାହିକା ନାୟିକା ଛନ୍ଦିତା ମହାପାତ୍ର, ପ୍ରମୁଖ ଯୋଗ ଦେଇଥିଲେ। ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦିଙ୍କ ଲୋକାଭିମୁଖୀ କାର୍ୟ୍ୟକୁ ପ୍ରଶାଂସା କରିବା ସହିତ ଭୋଟ ଭିକ୍ଷା କରିଥିଲେ । ପ୍ରଶାସନ ପକ୍ଷରୁ ସହଯୋଗ କରାନଯିବାରୁ ସାଂସଦ ଶ୍ରୀ ମହାନ୍ତି ଫେରିଯିବା କଥା ଭାରତୀୟ ଜନତା ପାର୍ଟି ପକ୍ଷରୁ ଅଭିଯୋଗ ହୋଇଥିବା ବେଳେ ବାଲିଆପାଳ ଥାନାଅଧିକାରୀ ସହଦେବ ନାୟକଙ୍କୁ ଏ ସଂକ୍ରାନ୍ତରେ ପଚାରିବାରୁ ସେ ବିଜେପି ପକ୍ଷରୁ ୪ରୁ ୫ ହଜାର ଲୋକ ସମାଗମ ହେବାର ସୂଚନା ଦିଆଯାଇଥିବା ବେଳେ ୨୫ ହଜାରରୁ ଅଧିକ ଲୋକ ସମାଗମ ହେବା ଏବଂ ଏତେ ସଂଖ୍ୟାକ ଲୋକଙ୍କୁ ନିୟନ୍ତ୍ରଣ କରିବା ପାଇଁ ଆବଶ୍ୟକ ପୋଲିସ ଫୋର୍ସ ନଥିବା ଯୋଗୁଁ ଏଭଳି ଅବ୍ୟବସ୍ଥା ହୋଇଥିବା କଥା କହିଛନ୍ତି ।