ନୂଆଦିଲ୍ଲୀ : ଛତିଶଗଡ଼ ରାଜ୍ୟପାଳ ବିଶ୍ୱଭୂଷଣ ହରିଚନ୍ଦନଙ୍କ ମୂଳ ଆତ୍ମଜୀବନୀ ପୁସ୍ତକ ‘ସଂଗ୍ରାମ ସରିନାହିଁ’ର ଇଂରାଜୀ ଅନୁବାଦ ‘ବ୍ୟାଟେଲ ନଟ୍ ୟେଟ୍ ଓଭର’ ପୁସ୍ତକ ନୂଆଦିଲ୍ଲୀସ୍ଥିତ ଇଣ୍ଡିଆ ଇଣ୍ଟରନ୍ୟାସନାଲ ସେଣ୍ଟରଠାରେ ଉନ୍ମୋଚିତ ହୋଇଛି। ପୁସ୍ତକରେ ଶ୍ରୀ ହରିଚନ୍ଦନଙ୍କ ଛାତ୍ରଜୀବନ, ଜରୁରୀକାଳୀନ ପରିସ୍ଥିତି ସମୟରେ ତତ୍କାଳୀନ ସରକାରଙ୍କ ନୀତି ବିରୋଧରେ ସ୍ୱର ଉତ୍ତୋଳନ ଏବଂ ନ୍ୟାୟ ବ୍ୟବସ୍ଥାକୁ ସଜାଡ଼ିବା ପାଇଁ ଲଢ଼େଇ ବିଷୟ ସ୍ଥାନ ପାଇଛି। ଏଥିସହ ମନ୍ତ୍ରିତ୍ୱକାଳରେ ଜନହିତକର କାର୍ଯ୍ୟ ଏବଂ ସାଧାରଣ ଜନତାଙ୍କ ମୌଳିକ ଅଧିକାର ସୁରକ୍ଷିତ ପାଇଁ ସେ ଉଠାଇଥିବା ସ୍ୱର ଆଦି ବିଷୟ ରହିଛି। ଏହି ଅବସରରେ ରାଜ୍ୟପାଳ ହରିଚନ୍ଦନ କହିଥିଲେ ଯେ ତାଙ୍କ ଜୀବନ ମାଟି ମା’ ଓ ମଣିଷଙ୍କ ପାଇଁ ସମର୍ପିତ। ଜୀବନତମାମ ସାଧାରଣ, ଅସହାୟ ଓ ନିଷ୍ପେଷିତ ମଣିଷଙ୍କ ପାଇଁ କାର୍ଯ୍ୟ କରିବେ। ସମାଜର ବିକାଶ ପାଇଁ ଶେଷ ନିଶ୍ୱାସ ପର୍ଯ୍ୟନ୍ତ ତାଙ୍କର ସଂଗ୍ରାମ ଜାରି ରହିବ। ସର୍ବୋଚ୍ଚ ନ୍ୟାୟାଳୟର ଅବସରପ୍ରାପ୍ତ ବିଚାରପତି ଭି. ଗୋପାଳଗୌଡ଼ାଙ୍କ ସଭାପତିତ୍ୱରେ ଅନୁଷ୍ଠିତ କାର୍ଯ୍ୟକ୍ରମରେ ଭାରତୀୟ ଆଇନ କମିସନ ଅଧ୍ୟକ୍ଷ ବିଚାରପତି ଋତୁରାଜ ଅୱସ୍ତି, ଓଡ଼ିଶା ଉଚ୍ଚ ନ୍ୟାୟାଳୟ ବିଚାରପତି ବିଶ୍ୱନାଥ ରଥ ଓ କର୍ଣ୍ଣାଟକ ବାଚସ୍ପତି ୟୁ.ଟି. ଖାଦରି ଫରିଦଙ୍କୁ ସମ୍ବର୍ଦ୍ଧିତ କରାଯାଇଥିଲା। ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଇଣ୍ଡିଆନ କନଫରେନ୍ସ ଅଫ୍ ଇଣ୍ଟେଲେକ୍ଟଚୁଆଲ ସମ୍ପାଦକ ଶିବଶଙ୍କରାଚାର, କିସ୍ ବିଶ୍ୱବିଦ୍ୟାଳୟର ପ୍ରଫେସର ବିଜୟାନନ୍ଦ ସିଂହ, ସାହିତ୍ୟ ଅକାଦେମୀ ସଚିବ କେ ଶ୍ରୀନିବାସ ରାଓ, ପୁସ୍ତକ ଅନୁବାଦକ ପ୍ରଫେସର ଭଗବାନ ଜୟସିଂହ, ଉଦୟ ଇଣ୍ଡିଆ ନଲେଜ ଟ୍ରି ସଭାପତି ଦୀପକ ରଥ ପ୍ରମୁଖ ଉପସ୍ଥିତ ଥିଲେ।
Popular Categories
Previous article
Next article