ନୂଆଦିଲ୍ଲୀ : ନୋଏଡା ପୁଲିସ ଏକ ବାଇକ ଚୋର ଗ୍ୟାଙ୍ଗକୁ ଧରିଛି । ଏମାନେ ଦିଲ୍ଲୀରୁ ବାଇକ ଚୋରି କରି ଉତ୍ତର ପ୍ରଦେଶରେ ବିକୁଥିଲେ। ପୁଲିସର କହିବାନୁସାରେ ଏହି ଗ୍ୟାଙ୍ଗର ୩ ଜଣଙ୍କୁ ଗିରଫ କରାଯାଇଛି । ସେମାନଙ୍କ ନିକଟରୁ ଅନେକ ଚୋରି ବାଇକ ଜବତ ହୋଇଛି ।
ପୁଲିସ ସୂଚନା ଅନୁସାରେ ଏହି ଗ୍ୟାଙ୍ଗ ରାଜଧାନୀ ଦିଲ୍ଲୀରେ ବହୁତ ସକ୍ରିୟ ଥିଲେ । ଦିନ ଦ୍ବିପ୍ରହରେ ବାଇକ୍ ଚୋରି କରୁଥିଲେ । ସବୁ ବାଇକକୁ କମ୍ ଦାମରେ ଉତ୍ତର ପ୍ରଦେଶର ବିଭିନ୍ନ ଜିଲାରେ ବିକ୍ରି କରୁଥିଲେ । ଧରାପଡିଥିବା ୩ ଜଣ ଏକ ବୁଲେଟକୁ ୧୫ ହଜାର ଟଙ୍କାରେ ଏବଂ ସ୍ପ୍ଲେଣ୍ଡରକୁ ୯ ହଜାର ଟଙ୍କାରେ ବିକୁଥିଲେ । ସମସ୍ତଙ୍କୁ ଗିରଫ କରିବା ସହ ୨୦ଟି ଚୋରି ବାଇକକୁ ଜବତ କରିଛି ପୁଲିସ ।
ଗିରଫ ହୋଇଥିବା ଯୁବକମାନେ ହେଲେ ରଜନୀକାନ୍ତ ସିଂହ, ତାଙ୍କ ଭାଇ ବିନୟ ଏବଂ ସହଯୋଗୀ ଆଦିତ୍ୟପାଲ ସିଂହ । ସୁରଜପୁର ଥାନାରୁ ଏ ଗ୍ୟାଙ୍ଗ ସମ୍ପର୍କରେ ସୂଚନା ମିଳିଥିଲା । ଏହାପରେ ପୁଲିସ ପିଛା କରି ଏହି ୩ ଜଣଙ୍କୁ ଗିରଫ କରିଥିଲା । ପୁଲିସ କହିଛି କି ରଜନୀକାନ୍ତ ଓ ତାଙ୍କ ଭାଇ ବିନୟ ଗାଡି ଚୋରି କରି ଆଦିତ୍ୟକୁ ବିକ୍ରି କରିଦିଅନ୍ତି । ସେ ଏହି ଗାଡିକୁ ଅଲୀଗଡ, ଏଟା, ଫରୁଖାବାଦ ଏବଂ ଆଖପାଖ ଅଞ୍ଚଳରେ ଗାଡିକୁ କମ୍ ଦାମରେ ବିକ୍ରି କରିଥାଏ । ତେବେ ତାଙ୍କ ଗ୍ୟାଙ୍ଗରେ ଆଉ କେତେ ଜଣ ସାମିଲ ଅଛନ୍ତି ସେନେଇ ଖୋଳତାଡ କରୁଛି ପୁଲିସ । ଅଭିଯୁକ୍ତଙ୍କ ନିକଟରୁ ୭ଟି ବୁଲେଟ, ୧ ଟିଭିଏସ ଆପାଚେ, ୧ ୟାମାହା ଏଫଜେଡ୍, ୯ଟି ହିରୋ ସ୍ପ୍ଲେଣ୍ଡର ଏବଂ ୧ ହିରୋ ପ୍ୟାସନ ପ୍ରୋ ଜବତ କରିଛି ପୁଲିସ ।
