ଆଠଗଡ : କୂଅରେ ପଡିଥିବା ଏକ ବାରହାକୁ ଉଦ୍ଧାର କରିବା ପରେ ତା ଆକ୍ରମଣରେ ଜଣେ ଗୁରୁତର ଆହତ ହୋଇଥିବା ଜଣାପଡଛି। ଗୁରୁତର ଆହତ ଜଳନ୍ଧର ଲେଙ୍କାଙ୍କୁ ପ୍ରଥମେ ଆଠଗଡ ଡାକ୍ତରଖାନାରେ ପ୍ରାଥମିକ ଚିକିତ୍ସା ପରେ କଟକ ସ୍ଥାନାନ୍ତର କରାଯାଇଛି । ବିବରଣୀରୁ ପ୍ରକାଶ ଯେ ଆଠଗଡ ବନାଞ୍ଚଳ ଅନ୍ତର୍ଗତ ତରଡିଙ୍ଗ ଗ୍ରାମର ସ୍ବର୍ଗତ କୃଷ୍ଣଚନ୍ଦ୍ର ଦାଶଙ୍କ ଘର ପଛ ପାଖ କୂଅରେ ନିକଟସ୍ଥ ଜଙ୍ଗଲରୁ ଖାଦ୍ୟ ଅନ୍ବେଷଣରେ ଆସିଥିବା ଏକ ବାରହା ଖସି ପଡିଥିଲା । ଭୋର ସମୟରେ କୂଅରେ ଏକ ବାରହା ପଡିଥିବା ଦେଖି ଗ୍ରାମର ସ୍ୱେଚ୍ଛାସେବୀ ସୁଜିତ ମିଶ୍ର ବନାଞ୍ଚଳ ଅଧିକାରୀଙ୍କୁ ସୂଚନା ଦେଇଥିଲେ। ବନାଞ୍ଚଳ ଅଧିକାରୀ ରବୀନ୍ଦ୍ର କୁମାର ନାୟକଙ୍କ ନିର୍ଦ୍ଦେଶରେ ବନ କର୍ମଚାରୀ ଘଟଣାସ୍ଥଳରେ ପହଞ୍ଚି ବହୁ ଉଦ୍ୟମ ପରେ ଜାଲ ସାହାଯ୍ୟରେ ବାରହାକୁ ଉଦ୍ଧାର କରିଥିଲେ । ମାତ୍ର ବାରହାଟି ଜାଲରୁ ଖସି ଯାଇ ସେଠାରେ ଛିଡା ହୋଇଥିବା ଜଳନ୍ଧରଙ୍କ ଜଂଘ ଓ ହାତକୁ କାମୁଡି ଦେଇଥିଲା । ତେବେ ବାରହା କାମୁଡାରେ ଗଭୀର କ୍ଷତ ହୋଇ ଗୁରୁତର ଆହତ ହେବା ସତ୍ତ୍ୱେ ଜଳନ୍ଧର ସାହସର ସହିତ ବିରାଟକାୟ ବାରହାଟିକୁ ମାଡିବସିଥିଲେ। ସେହି ସମୟରେ ବନ କର୍ମଚାରୀମାନେ ତୁରନ୍ତ ଉକ୍ତ ବାରହାକୁ କାବୁ କରି ନେବା ସହ ତାକୁ ଜଙ୍ଗଲରେ ଛାଡି ଦେଇଥିଲେ । ବନ ବିଭାଗ ପକ୍ଷରୁ ଗୁରୁତର ଆହତ ଜଳନ୍ଧରଙ୍କ ଚିକିତ୍ସା ବ୍ୟବସ୍ଥା କରାଯାଉଥିବା ଜଣାପଡିଛି ।
Comments are closed.