ବାଙ୍କୀ :ବୈଦ୍ୟେଶ୍ୱର ଥାନା ଅନ୍ତର୍ଗତ ପଣ୍ଡଳମ ଗ୍ରାମର ଦୁଇଜଣ ଶାସକ ଦଳର ସମର୍ଥକଙ୍କୁ ମଙ୍ଗଳବାର ସନ୍ଧ୍ୟାରେ ମରଣାନ୍ତକ ଆକ୍ରମଣ କରାଯାଇଛି। ଏଥିରେ ଦୁଇଜଣ ବିଜେଡି ସମର୍ଥକଙ୍କ ହାତ ଓ ଗୋଡ ଭାଙ୍ଗି ଯାଇଥିବା ଜଣାପଡିଛି। ଉଭୟ ଗୁରୁତରଙ୍କୁ ପ୍ରଥମେ କଳାପଥର ଓ ପରେ ଖୋର୍ଦ୍ଧା-ଭୁବନେଶ୍ୱର ସ୍ଥାନାନ୍ତରିତ କରାଯାଇଛି।
ଘଟଣାରୁ ପ୍ରକାଶ ଯେ, ପୁଇଁଚା ପଞ୍ଚାୟତ ଅନ୍ତର୍ଗତ ପଣ୍ଡାଳମ ଗ୍ରାମର ଦେବରାଜ ଦାଶ ଓ ପ୍ରଫୁଲ ଦାସ ଉଭୟ ଏକ ବନ୍ଧୁଘରୁ ଫେରି ନିଜଘର ପଣ୍ଡାଳମକୁ ଯାଉଥିବାବେଳେ କଢାମଲ ଗ୍ରାମ ନିକଟସ୍ଥ କଳାମାଟିଆ କଦଳିଫାର୍ମ ଠାରେ ୪ ଜଣ ଯୁବକ ହଠାତ୍ ସେମାନଙ୍କୁ ଲୁହାଛଡ ଓ ଠେଙ୍ଗାରେ ଅତର୍କିତ ଭାବରେ ଆକ୍ରମଣ କରିଥିଲେ। ଆହତ ଦ୍ୱୟ ବାଇକରୁ ଖସିପଡି ଥିବା ବେଳେ ଦୁର୍ବୃତ୍ତ ମାନେ ଘେରି ଯାଇ ହାତ, ମୁଣ୍ଡ ଓ ଗୋଡକୁ ନିସ୍ତୁକ ପିଟିଥିଲେ। ଫଳରେ ଦେବରାଜ ଦାସଙ୍କ ଦୁଇ ଗୋଡ ଓ ଦୁଇ ହାତ ଭାଙ୍ଗି ଯିବା ସହିତ ମୁଣ୍ଡରେ ଗଭିର ଆଘାତ ଲାଗିଛି। ଏହି ମରଣାନ୍ତକ ଆକ୍ରମଣରେ ଦେବରାଜ ଦାସଙ୍କ ସାଙ୍ଗରେ ଯାଉଥିବା ପ୍ରଫୁଲ ଦାସଙ୍କୁ ମଧ୍ୟ ନିସ୍ତୁକ ମାଡ ପିଟିବା ଫଳରେ ତାଙ୍କର ମଧ୍ୟ ଗୋଟିଏ ଗୋଡ ଓ ଦୁଇ ହାତ ଭାଙ୍ଗି ଯାଇଥିବା ଜଣା ପଡିଛି। ଆହତ ମାନଙ୍କୁ ପ୍ରଥମେ କଳାପଥର ଚିକିତ୍ସାଳୟରେ ପ୍ରଥମିକ ଚିକିତ୍ସା କରାଯାଇଥିବା ବେଳେ ମୁଣ୍ଡରେ ୧୮ ଗୋଟି ସ୍ଥାନରେ ସିଲେଇ ହୋଇଥିବା ଜଣାପଡିଛି। ଖବର ପାଇ ବୈଦ୍ୟେଶ୍ୱର ପୁଲିସ୍ ଘଟଣାସ୍ଥଳରେ ପହଞ୍ଚିଥିବା ବେଳେ ଘଟଣାର ତଦନ୍ତ ଜାରି ରଖିଛି।