ବଣାଇ : ରାଜ୍ୟରେ ଅପରାଧୀକ ମାମଲା ଦିନକୁ ଦିନ ବଢିବାରେ ଲାଗିଛି। ବଣାଇ କେ ବଲାଙ୍ଗ ଅଞ୍ଚଳରୁ ବରସୁଆଁକୁ ବିଶ୍ଵକର୍ମା ପୂଜା ଦେଖିବାକୁ ଯାଇ ଫେରୁଥିବାବେଳେ ଗଣବଳାତ୍କାରର ଶିକାର ହୋଇଛନ୍ତି ଜଣେ ନାବାଳିକା। ସୂଚନା ଅନୁଯାୟୀ ଗୁରୁବାର କେ.ବଲାଙ୍ଗ ଗାଁର ଜଣେ ନାବାଳିକା ନିଜ ସାଙ୍ଗ ମାନଙ୍କ ସହ ମିଶି ବିଶ୍ଵକର୍ମା ପୂଜା ଦେଖିବାକୁ ବରସୁଆଁକୁ ଯାଇଥିଲେ। ତେବେ ପୂଜା ଦେଖି ଫେରିବା ସମୟରେ ଦୁଇ ଜଣ ଯୁବକ ନାବାଳିକାଙ୍କ ସାଙ୍ଗ ମାନଙ୍କୁ ଭୟଭୀତ କରାଇ ନାବାଳିକାକୁ ଜଙ୍ଗଲକୁ ଟେକି ନେଇଥିଲେ। ଏବଂ ସେଠାରେ ଗଣ ବଳାତ୍କାର କରିଥିବା ଅଭିଯୋଗ ହୋଇଛି।
ଗ୍ରାମବାସୀ ଏବଂ ପରିବାର ଲୋକେ ଖବର ପାଇ ବହୁ ଖୋଜାଖୋଜି କରି ନାବାଳିକାଙ୍କୁ ଉଦ୍ଧାର କରିଥିଲେ। ପରେ ଏନେଇ ନାବାଳିକା ଜଣକ କେ ବଲାଙ୍ଗ ଥାନାରେ ଅଭିଯୋଗ କରିଛନ୍ତି। ପୁଲିସ୍ ଘଟଣାରେ ଏକ ମାମଲା ରୁଜ୍ଜୁ କରି ଦୁଇ ଯୁବକଙ୍କୁ ଗିରଫ କରିଛି। ଆଜି ନାବାଳିକାଙ୍କର ଡାକ୍ତରୀ ମାଇନା କରାଯିବା ନେଇ ସୂଚନା ମିଳିଛି। ବାରମ୍ବାର ନାବାଳିକାଙ୍କ ପ୍ରତି ଘଟୁଥିବା ଅସଦାଚରଣ ମାମଲା ବଢିବା ନେଇ ସାଧାରଣରେ ଉଦ୍ବେଗ ପ୍ରକାଶ ପାଇଛି ।
