ବାଲିଆପାଳ : ମାଛ ନେଇ ଆସୁଥିବା ବ୍ୟବସାୟୀଙ୍କୁ ଧକ୍କା ଦେଲା ଚିପ୍ସ, ରଡ଼ ବୋଝେଇ ଟ୍ରାକ୍ଟର। ଘଟଣା ସ୍ଥଳରେ ମାଛ ବ୍ଯବସାୟୀଙ୍କ ମୃତ୍ୟୁ। ମୃତ ମାଛ ବ୍ୟବସାୟୀ ଜଣକ ହେଲେ ମୁରଲୀଧର ମଣ୍ଡଳ ( ୪୫)। ସୂଚନା ଅନୁଯାୟୀ ବାଲେଶ୍ଵର ଜିଲ୍ଲା ବାଲିଆପାଳ ଥାନା କାଳରୋହୀ ଗ୍ରାମର ମୁରଲୀଧର ମଣ୍ଡଳ ଆଜି ନିଜ ମଟର ସାଇକେଲ ଯୋଗେ ଡଗରା ସମୁଦ୍ର କୂଳ ଅଞ୍ଚଳରୁ ମାଛ ବୋଝେଇ କରି ବାଲିଆପାଳ ସିମୁଳିିଆ ବଜାରକୁ ବିକିବା ପାଇଁ ଆସୁଥିବା ବେଳେ ବାଲିଆପାଳ -କାଳିପଦା ମୁଖ୍ୟ ରାସ୍ତାର କୋଷ୍ଟ କେନାଲ ନିକଟରେ କାଳିପଦା ଅଭିମୁଖେ ଯାଉଥିବା ଏକ ଦ୍ରୁତଗାମି ଚିପ୍ସ, ରଡ ବୋଝେଇ ଟ୍ରାକ୍ଟର ତାଙ୍କୁ ଧକ୍କା ଦେଇଥିଲା। ଘଟଣା ସ୍ଥଳରେ ମାଛ ବ୍ୟବସାୟୀ ଜଣକ ମଟର ସାଇକେଲରୁ ତଳକୁ ଖସି ପଡ଼ିଥିଲା ବେଳେ ଟ୍ରାକ୍ଟରଟି ଘଟଣାସ୍ଥଳରୁ ପଳାଇଯାଇଥିଲା।
ସ୍ଥାନୀୟ ଲୋକେ ଗୁରୁତର ଆହତ ମୂରଲୀଧରଙ୍କୁ ୧୦୮ ଆମ୍ବୁଲାନ୍ସ ଯୋଗେ ବାଲିଆପାଳ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ଆଣିଥିଲେ। ମାତ୍ର ଡାକ୍ତର ତାଙ୍କୁ ସେଠାରେ ମୃତ ଘୋଷଣା କରିଥିଲେ। ଖବର ପାଇ ବାଲିଆପାଳ ପୁଲିସ ପହଞ୍ଚି ଦୁର୍ଘଟଣା ଘଟାଇ ଫେରାର ହୋଇଯାଇଥିବା ଟ୍ରାକ୍ଟରକୁ ଖୋଜୁଛି। ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି।ମୂରଲୀଧର ମାଛ ବ୍ୟବସାୟ କରି ପରିବାର ପ୍ରତିପୋଷଣ କରୁଥିଲେ।
