ବାଲେଶ୍ୱରର: ବାଲେଶ୍ୱର ଜିଲ୍ଲା ଖନ୍ତାପଡ଼ା ଥାନା ଷ୍ଟେସନ ରୋଡ଼ରେ ଥିବା ଏକ ମଦ ଦୋକାନ ମ୍ୟାନେଜରଙ୍କୁ ଆକ୍ରମଣ କରି ଲୁଟି ନେଇଛନ୍ତି ଦୁର୍ବୃତ୍ତ । ମ୍ୟାନେଜର ଜଣଙ୍କ ହେଲେ ଓଳିହାପଟଣା ଗାଁର ପୁନେଶ୍ୱର କୁମାର । ଗତକାଲି ରାତିରେ ସେ ଦୋକାନ ବନ୍ଦ କରି ଫେରୁଥିବା ବେଳେ ୧୬ ନମ୍ବର ଜାତୀୟ ରାଜପଥ ଉପରେ ତାଙ୍କୁ ଆକ୍ରମଣ କରି ୧ ଲକ୍ଷ ୩୦ ହଜାର ଟଙ୍କା ସହିତ ସୁନା ଚେନ ଓ ମୋବାଇଲ ଲୋଟି ନେଇଥିଲେ ଦୁର୍ବୃତ୍ତ ।
ଗତକାଲି ବିଳମ୍ବିତ ରାତିରେ ଦୁର୍ବୃତ୍ତ ମାନେ ଏକ ପଲସର ବାଇକରେ ଆସି ପ୍ରଥମେ ତାଙ୍କ ଗାଡିକୁ ଆଡା ପକାଇଥିଲେ, ପରେ ମଦ ଦୋକାନର ମ୍ୟାନେଜରଙ୍କ ହାତ ଓ ଅଣ୍ଟାକୁ କଟୁରୀରେ ଆକ୍ରମଣ କରିଥିଲେ । ଏହାପରେ ତାଙ୍କ ଠାରୁ ଟଙ୍କା ଓ ସୁନା ନେଇ ଫେରାର ହୋଇଯାଇଥିଲେ । ଭୟରେ ମ୍ୟାନେଜର ଜଣଙ୍କ ସେଠାରୁ ଦୌଡ଼ି ପଳାଇ ଆସିବା ବେଳେ ସ୍ଥାନୀୟ ଲୋକେ ଉଦ୍ଧାର କରି ପ୍ରଥମେ ଖନ୍ତାପଡ଼ା ମେଡିକାଲରେ ଭର୍ତ୍ତି କରିଥିଲେ ପରେ ସ୍ୱାସ୍ଥ୍ୟବସ୍ଥା ଗୁରୁତର ହେବାରୁ ବାଲେଶ୍ୱର ଫକୀର ମୋହନ ମେଡିକାଲ କଲେଜକୁ ସ୍ଥାନାନ୍ତର କରାଯାଇଛି । ଖନ୍ତାପଡ଼ା ପୁଲିସ ଘଟଣାର ତଦନ୍ତ ଜାରିରଖିଛି ।
