ବେଲଗାଁ : କରୋନା ମହାମାରୀ ପରିପ୍ରେକ୍ଷୀରେ ଲକଡାଉନ ନେଇ ପ୍ରଶାସନ ତତ୍ପର ଥିବା ବେଳେ ମଦମାଫିଆ ସେମାନଙ୍କ କାରନାମା ଆରମ୍ଭ କରିଛନ୍ତି। ସଇଁନ୍ତଲା ଥାନା ସାଲେଦମକ ଅଞ୍ଚଳରେ ବ୍ୟାପକ ରନ୍ଧା ମଦ କାରବାର ହେଉଥିବା ଅଭିଯୋଗ ନେଇ “ସମାଜ”ରେ ଖବର ପ୍ରକାଶିତ ହେବା ପରେ ଟିଟିଲାଗଡ ଅବକାରି ବିଭାଗ ପକ୍ଷରୁ ଚଢଉ କରାଯାଇଥିଲା। ତେବେ ଆଗତୁରା ସୂଚନା ପାଇ ମଦମାଫିଆ ଫେରାର ମାରିଥିଲେ। ଏନେଇ ସ୍ଥାନୀୟ ଅଞ୍ଚଳର ୯ଟି ମହିଳା ଗୋଷ୍ଠି ମଦମାଫିଆଙ୍କ ବିରୁଦ୍ଧରେ ଆଗକୁ ଆସିଛନ୍ତି। ଯୋଜନାବଦ୍ଧ ଭାବରେ ମହିଳା ଗୋଷ୍ଠିଙ୍କ ସହାୟତାରେ ମଙ୍ଗଲବାର ବଲାଙ୍ଗୀର ଜିଲାପାଳଙ୍କ ନିର୍ଦ୍ଦେଶରେ ଟିଟିଲାଗଡ ଅବକାରି ପୁଲିସ ଚଢଉ କରି ବ୍ୟାପକ ପରିମାଣରେ ମଦ ଏବଂ ଫାସ ଜବତ କରିଛି। ମୋଟ ୪୦ ବସ୍ତା ଫାଶ, ଟ୍ରକ ଟ୍ୟୁବ ଏବଂ ଜାରରେ ବିକ୍ରୀ ଉଦ୍ଦେଶ୍ୟରେ ଚାଲାଣ ପାଇଁ ରଖାଯାଇଥିବା ଦେଢଶହ ଲିଟରରୁ ଊର୍ଦ୍ଧ୍ବ ରନ୍ଧା ମଦ ଜବତ ହୋଇଛି। ନିକଟସ୍ଥ ଜଙ୍ଗଲ ଘେରରେ ରହିଥିବା ସୁଲିଆମାଲ, ତାଲବାହାଲ, ଲମକାନି ଅଞ୍ଚଳରେ ମଧ୍ୟ ବ୍ୟାପକ ରନ୍ଧା ମଦ ପ୍ରସ୍ତୁତି ଚାଲିଥିବା ନେଇ ଧରପଗଡ ଜୋର କରିବାକୁ ଅଞ୍ଚଳବାସୀ ଦାବି କରିଛନ୍ତି। ଚଢଉରେ ଟିଟିଲାଗଡ ଅବକାରି ଅଧିକାରୀ ଦେବରାଜ ଖମାରି, ଏଏସଆଇ ବୁଦ୍ଧଦେବ ପୁଟେଲ ପ୍ରମୁଖ ସାମିଲ ଥିଲେ। ମହିଳାମାନଙ୍କ ମଦ ବିରୋଧି କାର୍ଯ୍ୟକ୍ରମକୁ ବୁଦ୍ଧିଜୀବୀ ମହଲରେ ଉଚ୍ଚ ପ୍ରଶଂସା କରାଯାଇଛି।
Popular Categories
Previous article
Next article