ବଡ଼ମ୍ବା: ପୁରାତନ ବଡ଼ମ୍ବା ସହରକୁ ବିଜ୍ଞାପିତ ଅଞ୍ଚଳ ଘୋଷଣା କରିବା ଦିଗରେ ରାଜ୍ୟ ସରକାର ବିଳମ୍ବ କରୁଥିବା ନେଇ ନାଗରିକ ମଞ୍ଚ ତରଫରୁ ଉଦ୍ବେଗ ପ୍ରକାଶ କରାଯାଇଛି। ଆଗାମୀ ପୌର ନିର୍ବାଚନ ପୂର୍ବରୁ ସରକାର ଏଦିଗରେ ଦୃଷ୍ଟି ଦେବାକୁ ବଡ଼ମ୍ବା ନାଗରିକ ମଞ୍ଚ ନିଜ ଦାବି ଦୋହରାଇଛି। ସରକାର ସହରାଞ୍ଚଳ ବିକାଶ କରିବା ଲକ୍ଷନେଇ ରାଜ୍ୟରେ ୨୭ଟି ନୂତନ ବିଜ୍ଞାପିତ ଅଞ୍ଚଳ କରିବାକୁ ବିଧାନ ସଭାରେ ଏକାଧିକବାର ବିବୃତି ରଖିଥିବା ସତ୍ୱେ କାହିଁକି ଏଦିଗରେ କାଳବିଳମ୍ବ କରାଯାଉଛି ସେନେଇ ନାଗରିକମଞ୍ଚ ଆଶ୍ଚର୍ଯ୍ୟ ପ୍ରକାଶ କରିଛି। ମଞ୍ଚର ସଭାପତି ଦାମୋଦର ରଣାଙ୍କ ଅଧ୍ୟକ୍ଷତାରେ ରବିବାର ଏନେଇ ଏକ ବୈଠକ ଆଗତ କରାଯାଇଥିଲା।
ବୈଠକରେ ଆଗାମୀ ପଞ୍ଚାୟତ ନିର୍ବାଚନ ଘୋଷଣା ପୂର୍ବରୁ ତୁରନ୍ତ ବଡ଼ମ୍ବାକୁ ବିଜ୍ଞାପିତ ଅଞ୍ଚଳ ଘୋଷଣା କରିବା ଲାଗି ଦାବି କରାଯାଇଛି। ଏନେଇ ରାଜ୍ୟ ମୁଖ୍ୟମନ୍ତ୍ରୀ ଏବଂ ଗୃହ ଓ ନଗର ଉନ୍ନୟନ ମନ୍ତ୍ରୀଙ୍କ ଉଦେଶ୍ୟରେ ସାନି ସ୍ମାରକପତ୍ର ପ୍ରଦାନ କରାଯାଇଥିବା ମଞ୍ଚର ସାଧାରଣ ସମ୍ପାଦକ ଅମୀୟ ପଟ୍ଟନାୟକଙ୍କଠାରୁ ପ୍ରକାଶ। ସେହିଭଳି ସୁଦୂର କୋରାପୁଟ ଜିଲାରେ ୧୦ଟି ବିଜ୍ଞାପିତ ଅଞ୍ଚଳ ରହିଥିବା ବେଳେ ବର୍ଦ୍ଧିତ ଜନସଂଖ୍ୟା ଏବଂ ବିକାଶକୁ ଦୃଷ୍ଟି ଦିଆନଯାଇ ଏବେସୁଦ୍ଧା କଟକ ଜିଲା ମାତ୍ର ୩ଟି ବିଜ୍ଞାପିତ ଅଞ୍ଚଳରେ ସିମୀତ ରହିବା ପରିତାପର ବିଷୟବୋଲି ମଞ୍ଚ ତରଫରୁ ଅଭିଯୋଗ କରାଯାଇଛି। ସୁତରାଂ ରାଜ୍ୟ ସରକାର ନୂତନ ବିଜ୍ଞାପିତ ଅଞ୍ଚଳ ଘୋଷଣା ଏବଂ ସେସବୁର ନିର୍ବାଚନକୁ ପ୍ରାଥମିକତା ଦେବାକୁ ମଞ୍ଚ ତରଫରୁ ଏହି ଅବସରରେ ପ୍ରସ୍ତାବ ଦିଆଯାଇଛି। ଅନୁଷ୍ଠିତ ବୈଠକରେ ଅନ୍ୟମାନଙ୍କ ମଧ୍ୟରେ ଆଇନଜୀବୀ ପରେଶ ମହାନ୍ତି,ସଂଗଠକ ଲିଙ୍ଗରାଜ ରଣା ପ୍ରମୁଖ ମଞ୍ଚର ସଦସ୍ୟମାନେ ଉକ୍ତ ବୈଠକରେ ଯୋଗଦେଇଥିଲେ।
