ଗୋରୁ ବେପାରୀଙ୍କୁ ଆକ୍ରମଣ କରି ୫ଲକ୍ଷ ଟଙ୍କା ଲୁଟ୍

ପାଟଣା : କେନ୍ଦୁଝର ଜିଲ୍ଲା ୪୯ ନମ୍ବର ଜାତୀୟ ରାଜପଥର  ଡାବରଚୁଆ ପୋଲ ନିକଟରେ ଆଜି ମଧ୍ୟାହ୍ନରେ ଡଳଙ୍ଗ ଗ୍ରାମର ଜଣେ ଗୋରୁ ବେପାରୀ ସଙ୍କୀର୍ତ୍ତନ ହାତୀଙ୍କୁ ଆକ୍ରମଣ କରି ବାଇକରେ ଆସିଥିବା ୬ ଜଣ ଲୁଟିଆ ଯୁବକ ୫ ଲକ୍ଷ ଟଙ୍କା ଲୁଟି ନେଇଛନ୍ତି । ଗୋରୁ ବେପାରୀ ଜଣଙ୍କ ବେଲଦା ସାପ୍ତାହିକ ହାଟରୁ ବ୍ୟବସାୟ ସାରି ଟଙ୍କା ନେଇ ବାଇକ୍ ଯୋଗେ ୪୯ ନମ୍ବର ଜାତୀୟ ରାଜପଥରେ ଘରକୁ ଫେରୁଥିବା ସମୟରେ ୨ ଟି ବାଇକ୍ ରେ ୬ ଜଣ ଲୁଟିଆ ଆସି ତାଙ୍କୁ ଆକ୍ରମଣ କରିଥିଲେ। ଦୁବୃର୍ତ୍ତ ମାନେ ପଛରୁ ପିଛା କରି ଡାବରଚୁଆ ନିକଟରେ ବାଇକ୍ ଆଗରେ ରଖି ଅଟକାଇବା ପରେ ସମସ୍ତ ପକେଟ୍ ଓ ଡିକି ଚେକ୍ କରି ପାଖା ପାଖି ୫ ଲକ୍ଷ ଟଙ୍କା ଲୁଟି ନେଇ ଆଖିପିଛୁଳାକେ ଫେରାର ହୋଇ ଯାଇଥିଲେ । ମୌଖିକ ସୂଚନା ପାଇ ପୁଲିସ ତୁରୁମୁଙ୍ଗା ସହ ଆଖପାଖ ସମସ୍ତ ଥାନା ପୋଲିସ ଦୁବୃର୍ତ୍ତ ମାନଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ଛାନଭିନ ଜାରି ରଖିଛନ୍ତି। ତୁରୁମୁଙ୍ଗା ଥାନାଧିକାରୀ ଧର୍ମେନ୍ଦ୍ର ଶାନ୍ତି, ଏସ ଆଇ ରସାନନ୍ଦ ନାଏକ ଓ ତଦନ୍ତକାରୀ ଅଧିକାରୀ ଏସ ଆଇ କିଶୋର ଚନ୍ଦ୍ର ପାତ୍ର ବିଭିନ୍ନ ସ୍ଥାନରେ ଛାନ ଭିନ୍ କରିଥିଲେ ମଧ୍ୟ ସନ୍ଧ୍ୟା ୮ଟା ସୁଦ୍ଧା ଲୁଟେରାଙ୍କ ପତ୍ତା ମିଳିନାହିଁ। ଲୁଟେରାଙ୍କ ଆକ୍ରମଣରେ ଆହତ ସଙ୍କୀର୍ତ୍ତନ ପ୍ରାଥମିକ ଚିକିତ୍ସା ପରେ ଆଜି ସନ୍ଧ୍ୟାରେ ତୁରୁମୁଙ୍ଗା ଥାନାରେ ଲିଖିତ ଅଭିଯୋଗ କରିଛନ୍ତି।