ଆଠଗଡ଼: ଆଠଗଡ଼ ନୂଆ ବସଷ୍ଟାଣ୍ଡ ନିକଟରେ ଦୀର୍ଘ ଦିନ ହେବ ଏକ ଶୁଖିଲା ଗଛ ଛିଡା ହୋଇ ସତେ ଅବା ଲୋକଙ୍କ ପାଇଁ ବିପଦକୁ ଆମନ୍ତ୍ରଣ କରୁଛି। ସମ୍ପୂର୍ଣ୍ଣ ନବୀକରଣ ପରେ ନୂଆ ବସଷ୍ଟାଣ୍ଡଟି ଗତ ୨୦୨୨ ଅକ୍ଟୋବର ୨୭ ତାରିଖରେ ଉଦଘାଟିତ ହେଲା । ସେତେବେଳେ ଏହି ବିରାଟକାୟ ଛତିଆନ ଗଛଟି ଶୁଖିଲା ଅବସ୍ଥାରେ ଥିଲା । ନୂଆ ବସଷ୍ଟାଣ୍ଡ ପାଚେରୀ ଓ ନିକଟସ୍ଥ ସୁଲଭ ଶୌଚାଳୟ ମଝିରେ ଥିବା ଉକ୍ତ ଗଛଟି ବସ ଓ ବସଯାତ୍ରୀଙ୍କ ପାଇଁ ବିପଦ ସୃଷ୍ଟି କରୁଥିବାବେଳେ ସେତେବେଳେ ପୂର୍ତ୍ତ ବିଭାଗ କର୍ତ୍ତୃପକ୍ଷ ଶୁଖିଲା ଗଛକୁ କାହିଁକି କାଟିଲେ ନାହିଁ ତାହା ପ୍ରଶ୍ନବାଚୀ ସୃଷ୍ଟି କରିଛି। ପ୍ରାୟ ୫୦ ବର୍ଷର ପୁରୁଣା ଛତିଆନ ଗଛଟି ପ୍ରାୟ ୨ ବର୍ଷ ପୂର୍ବରୁ ମରି ଶୁଖିବାକୁ ଆରମ୍ଭ ହୋଇଥିଲା। ଏବେ ସେଥିରୁ ସାମାନ୍ୟ ପବନରେ ବଡ ବଡ ଶୁଖିଲା ଡାଳ ଭାଙ୍ଗି ପଡୁଛି। ସେହି ବାଟ ଦେଇ ପ୍ରତିଦିନ ଶତାଧିକ ଲୋକ ଯିବାଆସିବା କରୁଛନ୍ତି। ତା’ ନିକଟରେ ଶୌଚାଳୟ, ବସଷ୍ଟାଣ୍ଡ ପାଚେରୀ, ଫାଟକ ଏବଂ ଅନେକ ଦୋକାନ ରହିଛି । ଯେହେତୁ ବର୍ତ୍ତମାନ ପ୍ରାୟତଃ ପଶ୍ଚିମାଝଡ଼ ସାଙ୍ଗକୁ କାଳବୈଶାଖୀ ପ୍ରଭାବରେ ଝଡତୋଫାନ ହେଉଛି ସେଥିରେ ଶୁଖିଲା ବଡ ଡାଳ ଅବା ଗଛ ଉପୁଡ଼ି ପଡ଼ିବାର ଆଶଙ୍କା ରହୁଛି। ଏପରି ଘଟିଲେ କେତେବେଳେ କାହାର ଜୀବନ ଯିବ ତାହା କହିବା ମୁସ୍କିଲ। ଏ ବାବଦରେ ଅଭିଯୋଗ କଲେ ମଧ୍ୟ ଶୁଣିବାକୁ କେହି ନାହାନ୍ତି। ଏହି ବିଶାଳକାୟ ଔଷଧୀୟ ଗଛଟିର ଛେଲିକୁ ବିଭିନ୍ନ ସମୟରେ ଲୋକମାନେ ନେଇ ନିଜ ରୋଗ ଆରୋଗ୍ୟ ପାଇଁ କାମରେ ଲଗାଇଥାନ୍ତି। ଗଛଟିର ଛେଲି ନଷ୍ଟ ହେବା ଏବଂ ବୟସାଧିକ କାରଣରୁ ଗତ ଏକ ବର୍ଷରୁ ଅଧିକ ଦିନ ହେଲାଣି ଗଛଟି ସମ୍ପୂର୍ଣ୍ଣ ମରି ଶୁଖିଲା ଛିଡା ହୋଇଛି। ଏ ସମ୍ପର୍କରେ ଆଠଗଡ଼ ପ୍ରଶାସନ ଓ ପୂର୍ତ୍ତ ବିଭାଗ ଦୃଷ୍ଟିଦେଇ ତୁରନ୍ତ ଗଛଟିକୁ କିପରି କଟାଯିବ ସେ ଦିଗରେ ପଦକ୍ଷେପ ନେବା ପାଇଁ ସାଧାରଣରେ ଦାବି ହେଉଛି।
Popular Categories
Previous article
Next article