ଆଠଗଡ଼: ଆଠଗଡ଼ସ୍ଥିତ ଗୋପବନ୍ଧୁ କନିଷ୍ଠ ମହିଳା ମହାବିଦ୍ୟାଳୟ ଏନଏସଏସ ଓ ସ୍କାଉଟ-ଗାଇଡ ପକ୍ଷରୁ ଶନିବାର ଡେଙ୍ଗୁରୋଗ ସଂପର୍କୀତ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ସକାଳେ ଏନଏସଏସ ଓ ସ୍କାଉଟ-ଗାଇଡର ଶତାଧିକ ସ୍ୱେଚ୍ଛାସେବୀ ଛାତ୍ରୀ ହାତରେ ଡେଙ୍ଗୁ ସଂପର୍କୀତ ବିଭିନ୍ନ ସଚେତନଧର୍ମୀ ଲେଖା ସମ୍ବଳିତ ପ୍ଲାକାର୍ଡ ଧରି ସ୍ଲୋଗାନ ଦେଇ ସହର ପରିକ୍ରମା କରିଥିଲେ। ଏହି ଶୋଭାଯାତ୍ରାକୁ କଲେଜର ଅଧ୍ୟକ୍ଷା ସଂଯୁକ୍ତା ମହାପାତ୍ର ପତାକା ଦେଖାଇ ଉଦ୍ଘାଟନ କରିଥିଲେ। ଅପରାହ୍ନରେ କଲେଜ ପ୍ରେକ୍ଷାଗୃହରେ ଡେଙ୍ଗୁ ସଂପର୍କୀତ ଏକ ସଚେତନତା ସଭାରେ ମୁଖ୍ୟଅତିଥି ଭାବେ ଯୋଗଦେଇ ଆଠଗଡ଼ ଉପଖଣ୍ଡ ଡାକ୍ତରଖାନା ଅଧିକ୍ଷକ ଡାକ୍ତର ବିଜୟ କୁମାର ମିଶ୍ର ଯୋଗଦେଇ ଡେଙ୍ଗୁ ଜ୍ୱରର କାରଣ, ଲକ୍ଷଣ, ନିରାକରଣ ଓ ଚିକିତ୍ସା ସଂପର୍କରେ ଛାତ୍ରୀମାନଙ୍କୁ ବିସ୍ତୃତ ଭାବେ ବୁଝାଇଥିଲେ। ଏଡିସ ମଶା କାମୁଡିବା ଦ୍ୱାରା ଡେଙ୍ଗୁଜ୍ୱର ହେଉଥିବାରୁ ଏଡିସ ମଶାର ବଂଶବୃଦ୍ଧି କିପରି ନହେବ ସେ ବିଷୟରେ ବୁଝାଇବାକୁ ଯାଇ ଡାକ୍ତର ମିଶ୍ର ନିଜ ଘର ଚତୁଃପାର୍ଶ୍ବ ସଫା ରଖିବା, କୌଣସି ପାତ୍ରରେ ବା ଖାଲରେ ଅଧିକ ଦିନ ପାଣି ଜମା ହେବାକୁ ନଦେବା ଏବଂ ନିୟମିତ ମଶାରୀ ଲଗାଇ ଶୋଇବା ଲାଗି ପରାମର୍ଶ ଦେଇଥିଲେ। ଡେଙ୍ଗୁ ଅବା ଯେ କୌଣସି ଜ୍ୱର ଆସିଲେ ତାକୁ ହାଲକା ଭାବେ ଗ୍ରହଣ ନକରି ତୁରନ୍ତ ଡାକ୍ତରଙ୍କ ପରାମର୍ଶକ୍ରମେ ରକ୍ତ ପରୀକ୍ଷା କରିବା ସହିତ ଆବଶ୍ୟକୀୟ ଚିକିତ୍ସା କରାଇବା ଜରୁରୀ ବୋଲି ସେ ମତବ୍ୟକ୍ତ କରିଥିଲେ। କଲେଜର ଭାରପ୍ରାପ୍ତ ଅଧ୍ୟକ୍ଷା ଡଃ ସ୍ନେହଲତା ତ୍ରିପାଠୀଙ୍କ ସଂଯୋଜନାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଏନଏସଏସର ଯୋଜନା ଅଧିକାରିଣୀ ଅଧ୍ୟାପିକା ସ୍ମିତା ମହାପାତ୍ର ପ୍ରାରମ୍ଭିକ ସୂଚନା ଦେବା ସହ ଅତିଥି ପରିଚୟ ପ୍ରଦାନ କରିଥିବାବେଳେ ସ୍କାଉଟ-ଗାଇଡର ଅଧିକାରୀ ବିଜୟାଲକ୍ଷ୍ମୀ ମହାନ୍ତି ଧନ୍ୟବାଦ ଅର୍ପଣ କରିଥିଲେ। କଲେଜର ସମସ୍ତ ଅଧ୍ୟାପିକା, ଅଧ୍ୟାପକ ଓ କର୍ମଚାରୀ ଏହି କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।
Comments are closed.