ଆଠଗଡ: ଆଠଗଡ ଏନଏସି ଅଞ୍ଚଳରେ ଏକାଧିକ ପ୍ରକଳ୍ପର ଶିଳାନ୍ୟାସ ଓ ଉଦ୍ଘାଟନ ଶୁକ୍ରବାର ସ୍ଥାନୀୟ ବିଧାୟକ ତଥା କୃଷିମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁଙ୍କ କରକମଳରେ ଅନୁଷ୍ଠିତ ହୋଇଯାଇଛି। ଏନଏସି ଅଧ୍ୟକ୍ଷା ସସ୍ମିତା ରାଉତଙ୍କ ପ୍ରତ୍ୟକ୍ଷ ପରିଚାଳନାରେ ମନ୍ତ୍ରୀ ଶ୍ରୀ ସ୍ୱାଇଁ କନ୍ତୋଲ ବାରବାଟୀ ପୁଷ୍କରିଣୀର ନବୀକରଣ ଅମୃତ ଯୋଜନାରେ ୩.୧୫କୋଟି ଟଙ୍କା ବ୍ୟୟରେ ଏବଂ ପଦ୍ମସାହିର ବେନୁସାଗରର ପୁର୍ନରୁଦ୍ଧାର ପାଇଁ ୩୫ଲକ୍ଷ ଟଙ୍କା ବ୍ୟୟ ଅଟ୍ଟକଳରେ ହେବାକୁ ଥିବା କାର୍ଯ୍ୟର ଶିଳାନ୍ୟାସ କରିବା ସହ କାର୍ଯ୍ୟାଦେଶ ପ୍ରଦାନ କରିଥିଲେ।
ଏହା ସହିତ ବିଭିନ୍ନ ୱାର୍ଡରେ ମଠ, ମନ୍ଦିର ଓ ରାସ୍ତା ଆଦି ୧୭ଟି ପ୍ରକଳ୍ପର ଉଦ୍ଘାଟନ କରିବା ସହ ମନ୍ତ୍ରୀ ଶ୍ରୀ ସ୍ୱାଇଁ ୨ଟି ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିଛନ୍ତି। ପରେ ପରେ ଏନଏସି ଅଧ୍ୟକ୍ଷା ଶ୍ରୀମତୀ ରାଉତଙ୍କ ପୌରୋହିତ୍ୟରେ ମହୋତ୍ସବ ପଡିଆରେ ଆୟୋଜିତ କାର୍ଯ୍ୟକ୍ରମରେ ମନ୍ତ୍ରୀ ଯୋଗଦେଇ ୨୮ଜଣ ନୂତନ ହିତାଧିକାରୀଙ୍କ ସମେତ ୯୧୨ଜଣ ହିତାଧିକାରୀଙ୍କୁ ବର୍ଦ୍ଧିତ ହାରରେ ମଧୁବାବୁ ପେନସନ ଯୋଜନାରେ ଭତ୍ତାପ୍ରଦାନ କରିଥିଲେ।
ଏହି କାର୍ଯ୍ୟକ୍ରମରେ ସହରାଞ୍ଚଳର ଉନ୍ନୟନ ସଂସ୍ଥାର ପିଡି ହେମନ୍ତ କୁମାର ସ୍ୱାଇଁ, ନିର୍ବାହୀ ଅଧିକାରୀ ଡଃ ପ୍ରଦୀପ କୁମାର ସାହା, ପୂର୍ବତନ ନଗରପାଳ ରମେଶ ଚନ୍ଦ୍ର ଘଢାଇ ଓ ସୁଚିତ୍ରା ସାହୁ, ପୂର୍ବତନ କାଉନସିଲର ଶିବଶଙ୍କର ଜେନା, ଶିଶିର ପ୍ରସାଦ ମାନସିଂହ, ପ୍ରଦୀପ୍ତ କୁମାର ଦାସଙ୍କ ସମେତ ସମସ୍ତ କାଉନସିଲର ଉପସ୍ଥିତ ଥିଲେ। ଉପନଗରପାଳ ବି ଶୁଭ୍ରଶଙ୍କର ଜ୍ୟୋତି ଧନ୍ୟବାଦ ଅର୍ପଣ କରିଥିଲେ।
Comments are closed.