ଅନୁଗୁଳ: ଅନୁଗୁଳ ଜିଲ୍ଲା ଛେଣ୍ଡିପଦା ବ୍ଲକରେ ଥିବା ବଗଡ଼ିଆ ଗ୍ରାମରେ ନିରାକାର ମହାପାତ୍ରଙ୍କ ଅଗଣାରୁ ଏକ ସାପ ଉଦ୍ଧାର କରାଯାଇଛି। ସାପଟି ଏକ ମିକ୍ସଚର-ଗ୍ରାଇଣ୍ଡର ହ୍ୟାଣ୍ଡେଲରେ ଫସିଥିବା ଦେଖିବାକୁ ମିଳିଛି।
ସୂଚନା ଅନୁଯାୟୀ, ନିରାକାର ବାଡ଼ି ଅଗଣାରେ କିଛି ସମୟ ଧରି ଖଡ଼ଖଡ଼ ଶବ୍ଦ ଶୁଣିଥିଲେ। ଶବ୍ଦର ଉତ୍ପତ୍ତି କେଉଁଠି ଜାଣିବା ପାଇଁ ନିରାକାର ବାବୁ ଟର୍ଚ୍ଚ ଲାଇଟ ଧରି ଖୋଜାଖୋଜି କରିଥିଲେ। ପରେ ସେ ଦେଖିବାକୁ ପାଇଥିଲେ ଯେ, ତାଙ୍କ ବାଡ଼ି ଅଗଣାରେ ଏକ ପରିତ୍ୟକ୍ତ ମିକ୍ସଚର-ଗ୍ରାଇଣ୍ଡର ହ୍ୟାଣ୍ଡେଲ ଲାଗିଥିବା ମଗରେ ବଡ଼ ସାପ ଫସି ଯାଇଛି। ସାପଟି ଯିବା ବେଳେ ଉକ୍ତ ଷ୍ଟିଲ ପାତ୍ରଟି ଭୁଇଁରେ ଘଷି ହୋଇ ସେଇ ଶବ୍ଦ ବାହାରୁଛି। ଭୟଭୀତ ହେଇ ନିରାକାର ସ୍ନେକ ହେଲ୍ପ ଲାଇନକୁ ଫୋନ କରିିଥିଲେ। ସ୍ଥାନୀୟ ସ୍ନେକ ହେଲ୍ପ ଲାଇନ ସଦସ୍ୟ ହିମାଂଶୁ ଶେଖର ଦେହୁରୀ ଘଟଣା ସ୍ଥଳରେ ପହଞ୍ଚି ସାପଟିକୁ ଏକ ଢ଼ମଣା ସାପ ବୋଲି ଚିହ୍ନଟ କଲେ। ପ୍ରାୟ ୫ ଫୁଟ ଲମ୍ବର ଏହି ଢମଣା ସାପଟି ସେହି ଷ୍ଟିଲ ପାତ୍ରରେ ତଳେ ଥିବା କଣାରେ ଫସିଥିବା ବେଳେ ତା’ ପେଟ ପାଖରେ ଚମଡା ଓ ମାଂସ କଟିଯାଇଥିବା ଜଣାପଡିଛି।
ପାରେ ସ୍ନେକ ହେଲ୍ପ ଲାଇନର ସମ୍ପାଦକ ଶୁଭେନ୍ଦୁ ମଲ୍ଲିକଙ୍କ ସହ ପରାମର୍ଶ କରି ତାଙ୍କୁ ସାପର ଭିଡ଼ିଓ ପଠେଇଥିଲେ। ଶୁଭେନ୍ଦୁଙ୍କ ପରାମର୍ଶ କ୍ରମେ ଷ୍ଟିଲପାତ୍ରକୁ କାଟି ବାହାର କରାଯାଇ ସାପ ଦେହରେ ହୋଇଥିବା କ୍ଷତ ସ୍ଥାନକୁ ବ୍ୟାଣ୍ଡେଜ କରି ଜୀବାଣୁ ସଂକ୍ରମଣ ରୋକିବା ପାଇଁ ବେଟାଡିନ୍ ଲଗାଯାଇଥିଲା।
ଆଜି ସ୍ଥାନୀୟ ସରକାରୀ ପ୍ରାଣୀ ଚିକିତ୍ସା କେନ୍ଦ୍ରକୁ ସାପଟିକୁ ପରବର୍ତ୍ତୀ ଚିକିତ୍ସା ପାଇଁ ନିଆଯିବ। ଏନେଇ ସ୍ଥାନୀୟ ବନ ବିଭାଗକୁ ଆଗୁଆ ସୂଚନା ମଧ୍ୟ ଦିଆ ସରିଛି ।
