ଭବାନୀପାଟଣା: ଦୁୁଇଦିନିଆ ଓଡ଼ିଶା ଗସ୍ତରେ ଆସିଥିବା ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା ଭବାନୀପାଟଣାରେ ପହଞ୍ଚିଛନ୍ତି । ତାଙ୍କୁ ଓଡ଼ିଶା ବିଜେପି ସଭାପତି ବସନ୍ତ ପଣ୍ଡା, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, କେନ୍ଦ୍ରମନ୍ତ୍ରୀ ଜୁଏଲ୍ ଓରାମ ପ୍ରମୁଖ ସ୍ୱାଗତ କରିଥିଲେ । ଶ୍ରୀ ଶାହାଙ୍କୁ ପାରମ୍ପରିକ ରୀତିରେ ଉଚ୍ଛ୍ୱସିତ ସମ୍ବର୍ଦ୍ଧନା ଦିଆଯିବା ସହିତ ବିରାଟ ଶୋଭାଯାତ୍ରାରେ ସଭାସ୍ଥଳକୁ ନିଆଯାଉଛି । ଆଜି ଅପରାହ୍ଣରେ ଲାଲ ବାହାଦୂର ଷ୍ଟାଡିୟମରେ ଜନସାଧାରଣଙ୍କୁ ଶ୍ରୀ ଶାହା ଉଦ୍ବୋଧନ ଦେବେ ଏବଂ ଆସନ୍ତା କାଲି ବଲାଙ୍ଗୀରରେ ବିଜେପି ଯୁବ ନେତାଙ୍କ ସହିତ ଆଲୋଚନା କରିବେ । ଆସନ୍ତା ସାଧାରଣ ନିର୍ବାଚନକୁ ଦୃଷ୍ଟିରେ ରଖି ରାଜ୍ୟର ଦଳୀୟ ନେତା ଓ କର୍ମକର୍ତ୍ତର୍ାଙ୍କ ସହିତ ନିର୍ବାଚନ ରଣନୀତି ସଂକ୍ରାନ୍ତରେ ଶ୍ରୀ ଶାହା ଆଲୋଚନା କରିବେ ବୋଲି ଜଣାପଡ଼ିଛି । ବିଜେପୁର ଉପନିର୍ବାଚନରେ ବିଜେପିର ପରାଜୟ କାରଣରୁ ଦଳୀୟ କର୍ମକର୍ତ୍ତାଙ୍କ ସ୍ତରରେ ଶାହା କେତେକ ପରିବର୍ତ୍ତନ କରିପାରନ୍ତି ବୋଲି ସୂଚନା ମିଳିଛି । ଅପରପକ୍ଷରେ ଶାହାଙ୍କ ଗସ୍ତକୁ କଂଗ୍ରେସ ପକ୍ଷରୁ ବିରୋଧ କରାଯାଇଛି । କଳାପତାକା ପ୍ରଦର୍ଶନ କରିଥିବା କଂଗ୍ରେସର ୬ ଜଣ କର୍ମୀଙ୍କୁ ଅଟକ ରଖାଯାଇଛି ।
