ଆଗଲପୁର – ବଲାଙ୍ଗିର ଜିଲା ଆଗଲପୁର ତହସିଲରେ ଲଘୁ ଖଣିଜ ଦ୍ରବ୍ୟ ବାଲି, ପଥର ଓ ମୋରମର ବେଆଇନ କାରବାର ଦିନକୁ ଦିନ ବଢିବାରେ ଲାଗିଛି । ତହସିଲ କର୍ତୃପକ୍ଷଙ୍କ ଖାମଖିଆଲି ମନୋଭାବ ଯୋଗୁଁ ଅସାଧୁ ଲୋକେ ଚୋରା କାରବାରରେ ଲାଗିପଡିଥିବା ଅଭିଯୋଗ ହୋଇଛି । ବେଳେ ବେଳେ ଚଢଇ କରାଯାଉଥିଲେ ମଧ୍ୟ ଚୋର କାରବାର ତା ବାଟରେ ଚାଲିଛି । କିନ୍ତୁ ଯେଉଁ ଭଳି ଭାବେ ଚୋରା କାରବାର ବଢିଛି ତାକୁ ଦେଖିଲେ ଚଢଉ ସେଭଳି ହେଉ ନଥିବା ଚର୍ଚ୍ଚା ହେଉଛି ।
ଆଗଲପୁର ବ୍ଲକ ଅନ୍ତର୍ଗତ ରୋତ, ଫଟାମୁଣ୍ଡା, ଡୁଡୁକାମୁଣ୍ଡା ଗାଁରୁ ଚୋରା ଚାଲାଣ ହେଉଥିବା ବାଲି ବୋଝେଇ ଟ୍ରାକ୍ଟରଗୁଡ଼ିକୁ ତହସିଲ ବିଭାଗର ଏକ ସ୍ୱତନ୍ତ୍ର ଦଳ ଓଡି୦୩ଡି ୫୧୦୧, ଓଡି ୦୩ୟୁ ୭୬୮୯, ଓଡି୦୩ଡି ୨୩୮୬, ଓଡି୧୭ଇ ୩୫୧୭ ନମ୍ବର ଟ୍ରକ୍ଟରକୁ ଜବତ କରିଥିଲେ । ଆଗଲପୁର ତହସିଲଦାର ସୁଚିତା ପୁଷ୍ପା ନିଜେ ଟିମ୍ ସହ ଯାଇ ବାଲି ବୋଝେଇ ଟ୍ରାକ୍ଟରରୁ ୨୫ହଜାର ଟଙ୍କା ଓ ପଥର ବୋଝେଇ ଟ୍ରାକ୍ଟରରୁ ୩୦ହଜାର ଟଙ୍କା ଜରିମାନା ଆଦାୟ କରିଛନ୍ତି । ତେବେ ଏହି କାରବାରରେ ବହୁ ପେଶାଦାର ଲୋକଙ୍କର ହାତ ରହିଥିବା ସୂଚନା ମିଳିଛି । ଯେଉଁମାନେ ନିୟମିତ ଭାବେ ବାଲି, ପଥର, ମୋରମ ଚାଲାଣ କରୁଛନ୍ତି । ପ୍ରତିଦିନ ୫ରୁ ୧୦ଟି ଟ୍ରାକ୍ଟରରେ ଚୋରା କାରବାର ଚାଲୁଛି । ଅନେକ ଗାଡିର କାଗଜପତ୍ର ନଥିବା ବେଳେ ଲଘୁ ଖଣିଜ ଦ୍ରବ୍ୟ ନେବାର ଅନୁମତି ବି ନାହିଁ । ତେଣୁ ଆଗାମୀ ଦିନରେ ତହସିଲ କର୍ତୃପକ୍ଷ ନିୟମିତ ଚଢଉ କଲେ ଅଧିକ ରାଜସ୍ୱ ଆଦାୟ କରିବା ସହ ଚୋରା କାରବାର କିଭଳି ଆଗଲପୁର ତହସିଲରେ କମି ପାରିବ ସେ ଉପରେ ଦୃଷ୍ଟି ଦେବାକୁ ଦାବି ହେଉଛି ।
