ପଶୁଙ୍କୁ ନ୍ୟାୟ ଦେବାକୁ ଅଣ୍ଟା ଭିଡ଼ିଲେ ବଲିଉଡ଼ ଅଭିନେତ୍ରୀ : କୁକୁରକୁ ପିଟିଥିବା ବ୍ୟକ୍ତିଙ୍କ ନାଁରେ ମାମଲା ରୁଜୁ

ମୁମ୍ବଇ : ପଶୁମାନଙ୍କୁ ନ୍ୟାୟ ଦେବା ପାଇଁ ଆଗକୁ ବାହାରିଛନ୍ତି ବଲିଉଡ଼ ଅଭିନେତ୍ରୀ। ଗୋଟିଏ କୁକୁରକୁ ନ୍ୟାୟ ଦେବା ପାଇଁ ସାମାଜିକ ଗଣମାଧ୍ୟମରେ ହଇଚଇ ସୃଷ୍ଟି କରିଛନ୍ତି ୩ ବଲିଉଡ଼ ଅଭିନେତ୍ରୀ।

ସୂଚନା ଅନୁସାରେ, ମୁମ୍ବଇର ୱର୍ଲି ଅଞ୍ଚଳରେ ବର୍ଷାରୁ ରକ୍ଷା ପାଇବା ପାଇଁ ଗୋଟିଏ ବୁଲା କୁକୁର ଏକ କୋଠାଘର ଭିତରକୁ ପଶି ଯାଇଥିଲା। ଏହାପରେ ସେଠାକାର ଚୌକିଦାର ତାକୁ ନୃସଂସ ଭାବେ ପିଟିଥିଲା। ଏହି କୁକୁରର ଫଟୋ ଏବଂ ଭିଡିଓ ଏବେ ସାମାଜିକ ଗଣମାଧ୍ୟମରେ ଖୁବ୍‍ ଭାଇରାଲ୍‍ ହେବାରେ ଲାଗିଛି। ଯାହାକୁ ଅଭିନେତ୍ରୀ ସୋନମ କପୁର, ଅନୁଷ୍କା ଶର୍ମା ଓ ଜ୍ୟାକ୍‍ଲିନ୍‍ ଫର୍ଣ୍ଣାଣ୍ଡିସ୍‍ ନିଜ ଇନ୍‍ଷ୍ଟାଗ୍ରାମ ଆକାଉଣ୍ଟ ମାଧ୍ୟମରେ ଶେୟାର କରିଛନ୍ତି। ଏହି ଖବର ଭାଇରାଲ୍‍ ହେବା ପରେ କୁକୁରକୁ ପିଟିଥିବା ଉକ୍ତ ଚୌକିଦାର ନାମରେ ମାମଲା ରୁଜୁ ହୋଇଥିବା ସୂଚନା ମିଳିଛି।

ସେହି କୁକୁରର ଫଟୋ ଶେୟାର କରି ଅଭିନେତ୍ରୀମାନେ ତାକୁ ନ୍ୟାୟ ଦେବା କଥା କହିଛନ୍ତି। ଅନୁଷ୍କା କହିଛନ୍ତି, “ଏପରି ଅମାନବିକ କାର୍ଯ୍ୟ ନିହାତି ଅବିଶ୍ୱସନୀୟ। ଏବେ ସମୟ ଆସିଛି ଆମ ସମାଜର ଲୋକମାନଙ୍କ ସହ ମିଶି ଆଗକୁ ଆସିବା ଏବଂ ସେହିମାନଙ୍କୁ ନ୍ୟାୟ ଦେବା ଯେଉଁମାନେ ନିଜ ପାଇଁ ଠିଆ ହେବାକୁ ଅକ୍ଷମ”। ସୋନମ ଉକ୍ତ ଫଟୋକୁ ଶେୟାର କରି ଲେଖିଛନ୍ତି, “ଯେଉଁ ବ୍ୟକ୍ତି ଏପରି କାମ କରିଛନ୍ତି, ତାଙ୍କ ବିରୋଧରେ ମାମଲା ରୁଜୁ ହୋଇସାରିଛି”। ଏହାବ୍ୟତୀତ ଜ୍ୟାକ୍‍ଲିନ୍‍ ମଧ୍ୟ ଇନ୍‍ଷ୍ଟାଗ୍ରାମ୍‍ ଜରିଆରେ ଏହାକୁ ଶେୟାର କରି ଲୋକଙ୍କ ଧ୍ୟାନ ଆକର୍ଷଣ କରିଛନ୍ତି। ଅଭିନେତ୍ରୀମାନଙ୍କ ଏହି ପୋଷ୍ଟକୁ ନେଇ ଲୋକେ ସେମାନଙ୍କୁ ସମର୍ଥନ କରିଛନ୍ତି।