ମଥୁରା : ମଥୁରା ଥାନା ନୋହଝିଲର ୟମୁନା ଏକ୍ସପ୍ରେସୱେର ୭୧ ମାଇଲଖୁଣ୍ଟ ନିକଟରେ ମର୍ମନ୍ତୁଦ ଦୁର୍ଘଟଣାରେ ୫ ଜଣଙ୍କର ମୃତ୍ୟୁ ଘଟିଛି। ଏକ ବସ ଅନିୟନ୍ତ୍ରିତ ହୋଇ ଡିଭାଇଡର ଭାଙ୍ଗି ରାସ୍ତାର ଆର ପଟକୁ ଯାଇ ଏକ କାର ସହ ଧକ୍କା ହୋଇ ଓଲଟି ପଡିଛି। ଫଳରେ ଏଥିରେ କାରରେ ଥିବା ୪ ଯାତ୍ରୀ ଓ ବସ ଚାଳକଙ୍କ ମୃତ୍ୟୁ ଘଟିଛି। ପୁଲିସ ଅନୁଯାୟୀ, ବସ ଚାଳକର ଆଖି ଲାଗି ଯିବାରୁ ଏହି ଦୁର୍ଘଟଣା ଘଟିଛି।
ସୂଚନାନୁସାରେ, ଉକ୍ତ ଖାଲି ବସ୍ ନୋଏଡା ଠାରୁ ଆଗ୍ରା ଅଭିମୁଖେ ଯାଉଥିଲା। ଥାନା ନୋହଝିଲର ଅଞ୍ଚଳର ମାଇଲଖୁଣ୍ଟ ୭୧ ନିକଟରେ ବସ୍ ଅନିୟନ୍ତ୍ରିତ ଭାବରେ ଯାଇ ଡିଭାଇଡର୍ ଭାଙ୍ଗି ଅନ୍ୟ ଏକ ସ୍ଥାନରେ ପହଞ୍ଚିଥିଲା । ସେହି ପାର୍ଶ୍ୱରେ ଆଗ୍ରା ଠାରୁ ନୋଏଡା ଯାଉଥିବା କାର ସହିତ ବସ୍ ମୁହାଁମୁହିଁ ଧକ୍କା ହୋଇଥିଲା।
ଏହି ଦୁର୍ଘଟଣା ଏତେ ଭୟଙ୍କର ଥିଲା ଯେ ବସ୍ ଚାଳକର ଏବଂ କାରରେ ଥିବା ଚାରି ଜଣଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା। ଦୁର୍ଘଟଣା ସମ୍ପର୍କରେ ସୂଚନା ପାଇବା ମାତ୍ରେ ପୁଲିସ ଘଟଣାସ୍ଥଳରେ ପହଞ୍ଚିଥିଲେ। ଏକ୍ସପ୍ରେସୱେ କର୍ମଚାରୀଙ୍କ ସହାୟତାରେ କାରରେ ଫସି ରହିଥିବା ଲୋକଙ୍କୁ ପୁଲିସ ଉଦ୍ଧାର କରିଥିଲା। ଶବ ବ୍ୟବଚ୍ଛେଦ ପାଇଁ ପଠାଯାଇଥିଲା। ମୃତକଙ୍କ ପରିଚୟ ମିଳିପାରି ନାହିଁ । କାର ଯାତ୍ରୀମାନେ ଗାଜିଆବାଦରୁ ଆସୁଥିଲେ।
ଦୁର୍ଘଟଣାର କିଛି ସମୟ ପର୍ଯ୍ୟନ୍ତ ରାସ୍ତା ଜାମ ହୋଇଥିଲା। ପୁଲିସ ଦୁର୍ଘଟଣାଗ୍ରସ୍ତ ଗାଡି ଗୁଡିକୁ ରାସ୍ତାରୁ ହଟାଇବା ପରେ ରାସ୍ତାରେ ଯାତାୟତ ସ୍ୱଭାବିକ ହୋଇଥିଲା।
Comments are closed.