ରେଙ୍ଗାଲିକ୍ୟାମ୍ପ : ଅତାବିରା ଏନଏସିର ଲାଦେରପାଳି ଛକଠାରେ ୫୪ ନମ୍ୱର୍ ଜାତୀୟ ରାଜପଥରେ ଆଜି ଦିନ ପ୍ରାୟ ୧୨ଟା ସମୟରେ ବରଗଡ଼ ଅଭିମୁଖେ ଯାଉଥିବା ଜଣେ ବୁଲେଟ ଆରୋହୀ ଏକ ଟ୍ରକ୍ ସହ ଘଷି ହୋଇଯିବା ଫଳରେ ଘଟଣା ସ୍ଥଳରେ ତାଙ୍କର ମୃତ୍ୟୁ ହୋଇଯାଇଛି।
ପୋଲିସ ସୂତ୍ରରୁ ଜଣାପଡିଛି ଯେ, ମୃତ ବ୍ୟକ୍ତି ଜଣକ ହେଲେ ଝାରସୁଗୁଡ଼ା ଜିଲ୍ଲା ବାଲିଯୋରି ଗ୍ରାମର ସୂର୍ଯ୍ୟ ପ୍ରକାଶ ମେହେର(୪୧) । ସେ ଏକ ଲାଲ ରଙ୍ଗର ବୁଲେଟ ଗାଡ଼ି ନମ୍ବର ଓଡି ୨୩ଏଫ୍୫୫୩୭ରେ ବରଗଡ଼ ବିକାଶ ହସ୍ପିଟାଲକୁ କୌଣସି କାମ ପାଇଁ ବରଗଡ଼ ଅଭିମୁଖେ ଯାଉଥିବା ବେଳେ ଲାଦେରପାଲି ଛକଠାରେ ଏକ ଅଜଣା ଟ୍ରକ୍ ଘଷି ହୋଇ ଫେରାର ମ।ରିଥିଲା। ଫଳରେ ସେ ଗାଡ଼ି ସହ ପଡିଯାଇଥିଲେ ଏବଂ ଘଟଣା ସ୍ଥଳରେ ତାଙ୍କର ମୃତ୍ୟୁ ହୋଇଥିଲା। ଖବର ପାଇ ଅତାବିରା ଥାନା ଅଧିକାରୀ ଦିଲିପ୍ ବେହେରା, ଅଶୋକ ବିଶି ଓ ସାଥୀ ଘଟଣା ସ୍ଥଳରେ ପହଞ୍ଚି ମୃତ ଶବକୁ ଜବତ କରି ବରଗଡ଼ ଡାକ୍ତରଖାନାକୁ ବ୍ୟବଚ୍ଛେଦ ପାଇଁ ପଠେଇଥିଲେ। ଏହି ରାସ୍ତାରେ ଏମିତି ବହୁତ ଜୀବନ ଅନାୟାସରେ ଚାଲିଯାଉଥିଲେ ହେଁ ରାସ୍ତା ସମ୍ପୂର୍ଣ୍ଣ ନିରାପଦ ହୋଇପାରୁନାହିଁ । ଚରିଥାକିଆ ରାସ୍ତା ହୋଇଛି ସତ କିନ୍ତୁ ଏହା ପରେ ବି ଦୁର୍ଘଟଣା କମି ନାହିଁ। କେତେବେଳେ ଗାଈଗୋରୁ ତ ଆଉ କେତେବେଳେ ମଣିଷ ଜୀବନ ହରାଉଛନ୍ତି । ତେବେ ଆଜିର ଦୁର୍ଘଟଣାର ଅଧିକ ତଦନ୍ତ ଜାରି ରହିଥିବା ଜଣାପଡ଼ିଛି।
