ପ୍ୟାରିସ : କାଶ୍ମୀର ହେଉଛି ଭାରତ ଓ ପାକିସ୍ତାନ ମଧ୍ୟରେ ଏକ ଦ୍ୱିପାକ୍ଷିୟ ପ୍ରସଙ୍ଗ ଏବଂ ଉଭୟ ଦେଶ ଆପୋଷ ଆଲୋଚନା ମାଧ୍ୟମରେ ସମସ୍ତ ମତପାର୍ଥକ୍ୟ ଦୂର କରିବା ଉଚିତ୍ । ଫ୍ରାନ୍ସର ବୈଦେଶିକ ମନ୍ତ୍ରୀ ଜିନ୍-ୟେଭେସ୍ ଲି ଡ୍ରିୟାନ୍ ଏକ ବିବୃତ୍ତିରେ କହିଛନ୍ତି, ଦୀର୍ଘସ୍ଥାୟୀ ଶାନ୍ତି ପ୍ରତିଷ୍ଠା ପାଇଁ ଉଭୟ ଭାରତ ଓ ପାକିସ୍ତାନ ଦ୍ୱିପକ୍ଷିୟ କଥାବାର୍ତ୍ତା ମାଧ୍ୟମରେ ସବୁ ସମସ୍ୟାର ସମାଧାନ କରିବା ଉଚିତ୍ ବୋଲି ତାଙ୍କ ଦେଶ ସବୁବେଳେ ମତ ଦେଇ ଆସିଛି । ଉଭୟ ଦେଶ ପରିସ୍ଥିତିକୁ ଶାନ୍ତ ରଖିବା ପାଇଁ ଉଦ୍ୟମ ଜାରି ରଖିବାକୁ ଫ୍ରାନ୍ସ ମତ ଦେଇଛି। ଦୁଇ ଦେଶ ଏଭଳି କାର୍ଯ୍ୟାନୁଷ୍ଠାନରୁ ନିବୃତ୍ତ ରହିବା ଆବଶ୍ୟକ ଯାହା ପରିସ୍ଥିତିକୁ ଅଧିକ ଗମ୍ଭୀର କରିବ ବୋଲି ବିବୃତ୍ତିରେ କୁହାଯାଇଛି ।
ସେହିପରି ବାଙ୍ଗଲାଦେଶ ମଧ୍ୟ କହିଛି ଯେ ନୂଆଦିଲ୍ଲୀ ଦ୍ୱାରା ଧାରା ୩୭୦ର ଉଚ୍ଛେଦ ଭାରତର ଆଭ୍ୟନ୍ତରୀଣ ବ୍ୟାପାର। ଭାରତ ଆନ୍ତର୍ଜାତିକ ସମୁଦାୟକୁ ନିର୍ଦ୍ଦିଷ୍ଟ ଭାବେ କହିଛି ଯେ ଜାମ୍ମୁ କାଶ୍ମୀରକୁ ସ୍ୱତନ୍ତ୍ର ମାନ୍ୟତା ପ୍ରଦାନ କରୁଥିବା ସମ୍ବିଧାନର ଧାରା ୩୭୦ର ଉଚ୍ଛେଦ ଦେଶର ଆଭ୍ୟନ୍ତରୀଣ ବ୍ୟାପାର ଏବଂ ଏହି ବାସ୍ତବତାକୁ ଆଦରି ନେବା ପାଇଁ ଭାରତ ପାକିସ୍ତାନକୁ ମଧ୍ୟ ପରାମର୍ଶ
ଦେଇଛି।
