ନୂଆଦିଲ୍ଲୀ : ରାୟଗଡ଼ା ଜିଲାର ଗୁଣୁପୁର ଓ ଥେରୁବାଲି ମଧ୍ୟରେ ପ୍ରସ୍ତାବିତ ୭୯.୧୫ କିଲୋମିଟର ଲମ୍ବ ନୂତନ ରେଳପଥକୁ ନିତି ଆୟୋଗ ଓ କେନ୍ଦ୍ର କ୍ୟାବିନେଟ ଅର୍ଥନୈତିକ ବ୍ୟାପାର କମିଟିର ମଞ୍ଜୁରୀ ଅଦ୍ୟାବଧି ମିଳି ନାହିଁ ବୋଲି କେନ୍ଦ୍ର ରେଳମନ୍ତ୍ରୀ ପିୟୁଷ ଗୋଏଲ ଲୋକସଭାରେ ଜଣାଇଛନ୍ତି। କୋରାପୁଟ ସାଂସଦ ସପ୍ତଗିରି ଉଲ୍ଲାକାଙ୍କ ପ୍ରଶ୍ନର ଉତ୍ତରରେ ରେଳମନ୍ତ୍ରୀ ଶ୍ରୀ ଗୋଏଲ ଦର୍ଶାଇଛନ୍ତି ଯେ ରେଳ ବଜେଟ ୨୦୧୭-୧୮ରେ ନୌପଡ଼ା-ଗୁଣୁପୁର ବ୍ରଡ଼ଗଜ ରେଳପଥକୁ ଥେରୁବାଲି ପର୍ଯ୍ୟନ୍ତ ସଂପ୍ରସାରିତ କରିବାକୁ ଘୋଷଣା ହୋଇଥିଲା। ଇତିମଧ୍ୟରେ ଗୁଣପୁର-ଥେରୁବାଲି ରେଳପ୍ରକଳ୍ପର ଡିପିଆର ପ୍ରସ୍ତୁତି ସରିଛି। ଡିପିଆର ତଥ୍ୟ ଅନୁଯାୟୀ ପ୍ରକଳ୍ପ ବ୍ୟୟ ବାବଦରେ ୧,୨୭୩.୭୪ କୋଟି ଅଟକଳ କରାଯାଇଛି। ମାତ୍ର ଏହି ରେଳ ପ୍ରକଳ୍ପରୁ ରେଳବାଇକୁ ନକାରତ୍ମକ ଭାବେ – ୩.୧୯ ପ୍ରତିଶତ ରେଟ ଅଫ ରିଟର୍ଣ୍ଣ (ଆରଓଆର) ମିଳିବାର ସମ୍ଭାବନା ଥିବାରୁ ଅର୍ଥନୈତିକ ଦୃଷ୍ଟିରୁ ଗୁଣୁପରୁ-ଥେରୁବାଲି ରେଳପ୍ରକଳ୍ପ ଲାଭପ୍ରଦ ହେବ ନାହିଁ ବୋଲି ରେଳବାଇ ମନ୍ତ୍ରୀ ପିୟୁଷ ଗୋଏଲ ଲୋକସଭାରେ ଜଣାଇଛନ୍ତି। ରେଳପ୍ରକଳ୍ପ ପାଇଁ ଆବଶ୍ୟକୀୟ ଜମି ମାଗଣାରେ ଯୋଗାଇବାକୁ ଏବଂ ଖର୍ଚ୍ଚର ଅଧା ବହନ କରିବାକୁ ଓଡ଼ିଶା ସରକାରଙ୍କୁ ଅନୁରୋଧ କରାଯାଇ ଥିଲେ ମଧ୍ୟ ରାଜ୍ୟ ସରକାର ଏପର୍ଯ୍ୟନ୍ତ ଉତ୍ତର ଦେଇନାହାନ୍ତି ବୋଲି ରେଳମନ୍ତ୍ରୀ ଶ୍ରୀ ଗୋଏଲ କହିଛନ୍ତି। କୋରାପୁଟରୁ ଭୂବନେଶ୍ୱର ଏବଂ ରାୟପୁର ମଧ୍ୟରେ ଅଧିକ ରେଳ ଚଳାଚଳ କରିବା ପ୍ରସଙ୍ଗରେ ରେଳମନ୍ତ୍ରୀ ଶ୍ରୀ ଗୋଏଲ କହିଥିଲେ ଯେ ଉଭୟ ସହରକୁ ଯୋଡ଼ିବା ପାଇଁ ଦୁଇ ଯୋଡ଼ା ରେଳ ଚଳାଚଳ କରୁଛି। ସମ୍ବଳ ଏବଂ ପରିଚାଳନାଗତ ବାଧ୍ୟବାଧକତା ଦୃଷ୍ଟିରୁ ଏବେ ଏହି ଦୁଇଟି ରେଳ ରୁଟରେ ଅଧିକ ରେଳ ଚଳାଚଳ ସମ୍ଭବ ନୁହେଁ ବୋଲି କେନ୍ଦ୍ର ରେଳମନ୍ତ୍ରୀ ପିୟୁଷ ଗୋଏଲ ଲୋକସଭାରେ କହିଥିଲେ।
Popular Categories
Previous article
Next article