ରବିବାର କର୍ତ୍ତାରପୁର କରିଡ଼ର ସଂକ୍ରାନ୍ତରେ ପରବର୍ତ୍ତୀ ବୈଠକ

ନୂଆଦିଲ୍ଲୀ : ଭାରତ ଓ ପାକିସ୍ତାନ ମଧ୍ୟରେ ଆସନ୍ତା ରବିବାର ଦିନ କର୍ତ୍ତାରପୁର କରିଡ଼ର ସଂକ୍ରାନ୍ତରେ ପରବର୍ତ୍ତୀ ବୈଠକ ବସିବ । ୱାଘା ସୀମାରେ ଏହି ବୈଠକ ଅନୁଷ୍ଠିତ ହେବ। କର୍ତ୍ତାରପୁର କରିଡ଼ର ରୂପରେଖ ଏବଂ ବୈଷୟିକ ପ୍ରସଙ୍ଗ ଉପରେ ଏହି ବୈଠକରେ ଆଲୋଚନା ହେବ । ଏହି ବୈଠକ ସକରାତ୍ମକ ହେବ ଏବଂ ବହୁ ସଂଖ୍ୟକ ତୀର୍ଥଯାତ୍ରୀ କର୍ତ୍ତାରପୁର ସାହିବ୍‍ ଦର୍ଶନ କରିବାକୁ ଯେପରି ଯାଇ ପାରିବେ ସେ ସଂପର୍କରେ ବିସ୍ତୃତ  ଆଲୋଚନା ହେବ ବୋଲି ଭାରତ ଆଶା କରୁଛି । ଡେରାବାବା ନାନକ ଯାତ୍ରୀ ଟର୍ମିନାଲ୍‍ ପରିସର ନିର୍ମାଣ କାର୍ଯ୍ୟ ଜୋରସୋର ଚାଲିଥିବା ଜଣାପଡ଼ିଛି । ଗୁରୁନାନକ ଦେବଜୀଙ୍କର ୫୫୦ ତମ ଜନ୍ମ ବାର୍ଷିକୀ ୨୦୧୯ ନଭେମ୍ବର ମାସରେ ପଡ଼ୁଥିବାରୁ ଆସନ୍ତା ଅକ୍ଟୋବର ମାସ ୩୧ ତାରିଖ ସୁଦ୍ଧା ଏହି ନିର୍ମାଣ କାର୍ଯ୍ୟ ଶେଷ କରିବାକୁ ଯୋଜନା ରଖାଯାଇଛି । ନିର୍ମାଣ କାର୍ଯ୍ୟରେ ୨୫୦ ଜଣ ଶ୍ରମିକ ଓ ୩୦ ଜଣ ଯନ୍ତ୍ରୀ କାର୍ଯ୍ୟରେ ନିୟୋଜିତ ହୋଇଛନ୍ତି । ୧୫ ଏକର ଜମିରେ ଏହି ଟର୍ମିନାଲ୍‍ ନିର୍ମାଣ କରାଯାଉଛି । ଦିନକୁ ୫ହଜାର ଯାତ୍ରୀ ଏହି ଟର୍ମିନାଲ୍‍ ଦେଇ ସୁବିଧାରେ ପାକିସ୍ତାନର ଗୁରୁଦ୍ୱାର କର୍ତ୍ତାରପୁର ସାହିବ୍‍ ଯିବା ଲାଗି ସବୁ ବ୍ୟବସ୍ଥା ରଖାଯାଇଛି।