ପଟନା: ବିହାରର ମୁଜଫରପୁରରେ ଏନସେଫାଲାଇଟିସ ଜ୍ଵରରେ ଆକ୍ରାନ୍ତ ହୋଇ ଜଣକ ପରେ ଜଣେ ଶିଶୁ ଆଖି ବୁଜିବାରେ ଲାଗିଛି। ହେଲେ ରାଜ୍ୟ ସରକାର କିମ୍ବା ପ୍ରଶାସନର କୌଣସି ତତ୍ପରତା ଦେଖିବାକୁ ମିଳିନାହିଁ। ଏହି ରୋଗରେ ୧୦୮ ଶିଶୁଙ୍କ ପ୍ରାଣ ଯିବା ପରେ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ନିଦ ଭାଙ୍ଗିଛି। ମଙ୍ଗଳବାର ସେ ମୁଜଫରପୁର ଗସ୍ତ କରିବା ସହ ସ୍ଥାନୀୟ ଶ୍ରୀକୃଷ୍ଣା ମେଡିକାଲ କଲେଜ ହାଣ୍ଡ ହସ୍ପିଟାଲକୁ ଯାଇ ରୋଗୀ ଏବଂ ସେମାନଙ୍କ ସମ୍ପର୍କୀୟଙ୍କୁ ଭେଟିଛନ୍ତି। କିନ୍ତୁ ସରକାରଙ୍କ ନିଷ୍କ୍ରିୟତା ଯୋଗୁ ମୁଜଫରବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖିବାକୁ ମିଳିଛି। ଅନ୍ୟପଟେ ଶିଶୁମାନେ ଯେଉଁ ହସ୍ପିଟାଲରେ ଚିକିତ୍ସିତ ହେଉଛନ୍ତି ସେଠାରେ ଆବଶ୍ୟକ ସୁବିଧା ନ ଥିବା ଏବଂ ଉପଯୁକ୍ତ ଚିକିତ୍ସା ମିଳୁ ନ ଥିବା ରୋଗୀଙ୍କ ସମ୍ପର୍କୀୟମାନେ ଅଭିଯୋଗ କରିଛନ୍ତି।
ତେବେ ଏନସେଫାଲାଇଟିସ ରୋଗରେ ଲଗାତାର ଶିଶୁଙ୍କ ମୃତ୍ୟୁ ଘଟୁଥିବାବେଳେ ମୁଖ୍ୟମନ୍ତ୍ରୀ ଏହି ପ୍ରସଙ୍ଗରେ ଚୁପ ରହିଥିବାରୁ ଏହାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ଗତ ସୋମବାର ବିହାରର ଜଣେ ମନ୍ତ୍ରୀଙ୍କୁ ଯେତେବେଳେ ପଚରାଗଲା ଯେ, ନୀତୀଶ କୁମାର ହସ୍ପିଟାଲ ଗସ୍ତ କରି ସ୍ଥିତି ଅନୁଧ୍ୟାନ କରିବେ କି, ସେତେବେଳେ ସେ ଉତ୍ତର ଦେଲେ ଯେ, ମୁଖ୍ୟମନ୍ତ୍ରୀ ସବୁ ପ୍ରସଙ୍ଗ ଉପରେ ନଜର ରଖିଛନ୍ତି। ହସ୍ପିଟାଲ ଯାଇ ରୋଗୀଙ୍କ ଅବସ୍ଥା ଦେଖିବା ଏବଂ ସେମାନଙ୍କୁ ଭେଟିବା କ’ଣ ଦରକାର ? ଜଣେ ମନ୍ତ୍ରୀଙ୍କ ଏଭଳି ସମ୍ବେଦନହୀନ ମନ୍ତବ୍ୟକୁ ରାଜ୍ୟବ୍ୟାପୀ ନିନ୍ଦା କରାଯାଇଛି। ଶିଶୁ ମୃତ୍ୟୁକୁ ନେଇ ଆରଜେଡିର ଛାତ୍ର ସଂଗଠନ ପକ୍ଷରୁ ନିତିଶ ସରକାର ବିରୋଧରେ ବିକ୍ଷୋଭ ପ୍ରଦର୍ଶନ କରାଯାଇଛି।
