ନୂଆଦିଲ୍ଲୀ: ଆସନ୍ତା ୧୩ ଏବଂ ୧୪ ତାରିଖରେ ହେବାକୁ ଥିବା ସଙ୍ଘାଇ ସହଯୋଗ ସଂଗଠନ(ଏସସିଓ) ବୈଠକରେ ଯୋଗଦେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। କିରଗିଜସ୍ତାନର ରାଜଧାନୀ ବିସ୍କେକ୍ ସହରରେ ଏହି ବୈଠକ ଅନୁଷ୍ଠିତ ହେବ। ଏଥିଲାଗି ମୋଦୀଙ୍କୁ ପାକିସ୍ତାନୀ ବାୟୁସୀମା ଦେଇ ବିମାନରେ ଯିବାକୁ ପଡ଼ିବ। ତେଣୁ ଏଥିପାଇଁ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ ଅନୁମତି ଦେଇଛନ୍ତି। ଇମ୍ରାନ ମଧ୍ୟ ଏହି ବୈଠକରେ ଯୋଗଦେବେ।
ଗତ ଫେବୃୟାରୀ ୨୬ରେ ବାଲାକୋଟରେ ଥିବା ଜୈଶ ଆତଙ୍କବାଦୀ ଶିବିରରେ ଭାରତୀୟ ବାୟୁସେନା ପକ୍ଷରୁ ଆକ୍ରମଣ କରାଯିବା ପରଠାରୁ ପାକିସ୍ତାନ ବିମାନ ଉଡ଼ାଣ ପାଇଁ ରହିଥିବା ଏହାର ବାୟୁସୀମାର ୧୧ଟି ରାସ୍ତାକୁ ବନ୍ଦ କରିଦେଇଥିଲା। ନିକଟରେ ଦକ୍ଷିଣ ପାକିସ୍ତାନ ଅଞ୍ଚଳରେ ଆକାଶମାର୍ଗରେ ମାତ୍ର ୨ଟି ରାସ୍ତା ଖୋଲାଯାଇଥିଲା। ତେବେ ମୋଦୀଙ୍କ ବିସ୍କେକ୍ ଗସ୍ତକୁ ଦୃଷ୍ଟିରେ ରଖି ପାକିସ୍ତାନ ବାୟୁସୀମା ଦେଇ ମୋଦୀଙ୍କ ବିମାନ ଉଡ଼ାଣ ପାଇଁ ଅନୁମତି ଦେବା ଲାଗି ଭାରତ ପକ୍ଷରୁ ଅନୁରୋଧ କରାଯାଇଥିଲା। ଏହାକୁ ଇମ୍ରାନ ଗ୍ରହଣ କରିବା ସହ ମୋଦୀଙ୍କ ବିମାନ ଯିବା ପାଇଁ ଅନୁମତି ପ୍ରଦାନ କରିଛନ୍ତି।
ପାକିସ୍ତାନ ସରକାରଙ୍କ ଜଣେ ଅଧିକାରୀ କହିଛନ୍ତି ଯେ, ଏ ସମ୍ପର୍କିତ ସମସ୍ତ ଔପଚାରିକତା ପୂରଣ ହେବା ପରେ ଭାରତ ସରକାରଙ୍କୁ ଆମ ନିଷ୍ପତ୍ତି ସମ୍ପର୍କରେ ଅବଗତ କରାଇ ଦିଆଯିବ। ଏ ନେଇ ବିମାନ ଚଳାଚଳ ମନ୍ତ୍ରଣାଳୟକୁ ନିର୍ଦେଶ ଦିଆଯିବ। ଏହା ସହିତ ସେ କହିଥିଲେ, ପାକିସ୍ତାନ ଆଶା ରଖିଛି ଯେ ଭାରତ ବି ଶାନ୍ତି ଆଲୋଚନା ପାଇଁ ଏହାର ପ୍ରସ୍ତାବକୁ ସ୍ବୀକାର କରିବ।
