ନୂଆଦିଲ୍ଲୀ : ଉତ୍ତରାଖଣ୍ଡ ଏବଂ ଉତ୍ତରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ନାରାୟଣ ଦତ୍ତ ତିୱାରୀଙ୍କ ପୁଅ ରୋହିତ ଶେଖରଙ୍କ ମଙ୍ଗଳବାର ସନ୍ଦେହଜନକ ଭାବେ ମୃତ୍ୟୁ ଘଟିଛି। ମୃତ୍ୟୁର କାରଣ ହୃଦ୍ଘାତ ବୋଲି କୁହାଯାଉଛି। ସାକେତ ମ୍ୟାକ୍ସ ଡାକ୍ତର ତାଙ୍କୁ ସନ୍ଧ୍ୟା ୫ଟା ୫୦ ସମୟରେ ମୃତ ଘୋଷଣା କରିଥିଲେ। ଦକ୍ଷିଣ ଦିଲ୍ଲୀ ଡିସିପି ବିଜୟ କୁମାର ଏହା ପ୍ରକାଶ କରିଛନ୍ତି।
ରୋହିତ ଶେଖର ଦିଲ୍ଲୀର ଡିଫେନ୍ସ କଲୋନିରେ ରହୁଥିଲେ। ମା’ ଏବଂ ପତ୍ନୀ ତାଙ୍କୁ ସାକେତ ମ୍ୟାକ୍ସ ହସ୍ପିଟାଲକୁ ନେଇ ପହଞ୍ଚିଥିଲେ। ଗତ ବର୍ଷ ଅକ୍ଟୋବର ୧୮ରେ ନାରାୟଣ ଦତ୍ତ ତିୱାରୀଙ୍କ ପରଲୋକ ଘଟିଥିଲା। ସେହି ଦିନ ତାଙ୍କ ଜନ୍ମ ଦିନ ମଧ୍ୟ ଥିଲା। ଦୀର୍ଘ ଦିନର ଆଇନଗତ ଲଢେଇ ପରେ ଏନ୍.ଡି ତିୱାରୀ ରୋହିତଙ୍କୁ ନିଜର ପୁଅ ବୋଲି ସ୍ୱୀକାର କରିଥିଲେ।
୨୦୦୮ରେ ରୋହିତ ଶେଖର ମୋକଦମା ଦାଏର କରି ଏନ.ଡି ତିୱାରୀଙ୍କୁ ନିଜ ବାପା ବୋଲି ଦାବି କରିଥିଲେ। ଏହି ମାମଲାରେ ଦିଲ୍ଲୀ ହାଇକୋର୍ଟ ଏନ୍ଡି ତିୱାରୀଙ୍କ ଡିଏନଏ ମ୍ୟାପିଂ କରିବାକୁ ରାୟ ଦେଇଥିଲେ। ୨୦୧୨ ଜୁଲାଇ ୨୭ରେ ଦିଲ୍ଲୀ ହାଇକୋର୍ଟ ଡିଏନଏ ପରୀକ୍ଷା ରିପୋର୍ଟକୁ ସାର୍ବଜନୀନ କରିଥିଲେ। ଡିଏନଏ ପରୀକ୍ଷା ଅନୁସାରେ ଏନ୍ଡି ତିୱାରୀ ରୋହିତଙ୍କ ବାପା ବୋଲି କୋର୍ଟ ଘୋଷଣା କରିଥିଲେ।
Comments are closed.