ମୁମ୍ବଇ : ଶୁକ୍ରବାର ଅପରାହ୍ନରେ ମୁମ୍ବଇ ଆକାଶମାର୍ଗରେ ଦୁଇଟି ଅନ୍ତରାଷ୍ଟ୍ରୀୟ ବିମାନ ଏକ ବଡ ଦୁର୍ଘଟଣାରୁ ଅଳ୍ପକେ ବର୍ତ୍ତି ଯାଇଛନ୍ତି । ଦୁଇଟି ବିମାନ ପରସ୍ପର ସମ୍ନାସାମ୍ନି ହୋଇ ଯାଇଥିଲେ ମଧ୍ୟ ମାତ୍ର ଅଳ୍ପ କିଛି ସେକେଣ୍ଡର ବ୍ୟବଧାନରେ ଦୁର୍ଘଟଣାକୁ ଟାଳି ଦିଆଯାଇଥିଲା। କୋଲିଜନ ଆଭଏଡାନ୍ସ ସିଷ୍ଟମ ଜରିଆରେ ଏହି ଦୁଇ ବିମାନକୁ ପଛକୁ ହଟେଇ ଦିଆଯାଇଥିଲା ।
ଏଭଳି ପରିସ୍ଥିତି ପାଇଁ ମୁମ୍ବଇ ଏୟାରଲାଇନ୍ସ ପକିସ୍ତାନକୁ ଦାୟୀ କରିଛି । କାରଣ ଫେବୃଆରୀ ୨୭ରୁ ପାକିସ୍ତାନ ନିଜର ସମସ୍ତ ଆକାଶ ମାର୍ଗକୁ ବନ୍ଦ କରି ରଖିଛି । ଏହି କାରଣରୁ ମୁମ୍ବାଇ ଆକାଶ ମାର୍ଗରେ ଏବେ ବିମାନ ଯାତ୍ରା ବଢିଯାଇଛି । ସେଥିପାଇଁ ଏହି ଦୁଇଟି ବିମାନ ଗୋଟିଏ ମାର୍ଗରେ ଯାତ୍ରା କରୁଥିଲେ । ଟ୍ରାଫିକ ନିୟନ୍ତ୍ରଣ କରିବା ପାଇଁ ଏୟାର ଟ୍ରାଫିକ କଂଟ୍ରୋଲରଙ୍କୁ ନିଯୁକ୍ତ କରାଯାଇଛି ।
ମିଳିଥିବା ସୂଚନା ଅନୁଯାୟୀ, ଶୁକ୍ରବାର ୧ଟା ୪୦ରେ ଚି ମିନ୍ ସହରରୁ ପ୍ୟାରିସ ଯାଉଥିବା ଏୟାର ଫ୍ରାନ୍ସର ବୋଇଙ୍ଗ-୭୭୭ ବିମାନ ୩୨ ହଜାର ଫୁଟ ଉଚ୍ଚରେ ଥିଲା । ଅନ୍ୟପଟେ ଅବୁଧାବି ଠାରୁ କାଠମାଣ୍ଡୁ ଯାଉଥିବା ଏତିହାଦ ଏୟାରବସ ୩୨୦ ବିମାନ ୩୧ ହଜାର ଫୁଟ ଉଚ୍ଚରେ ଥିଲା । ଏହି ସମୟରେ ଏୟାର ଟ୍ରାଫିକ ନିୟନ୍ତ୍ରକ(ଏଟିସି) ଏତିହାଦ ବିମାନକୁ ୩୩ହଜାର ଫୁଟ ଉଚ୍ଚକୁ ଯିବା ପାଇଁ ନିର୍ଦ୍ଦେଶ ଦେଇଥିଲା । ଯାହା ଫଳରେ ଏତିହାଦ ବିମାନ ବୀପରିତ ଦିଗରେ ଆସୁଥିବା ଏୟାର ଫ୍ରାନ୍ସ ବିମାନର ସାମ୍ନାସାମ୍ନି ହୋଇଥିଲା । ଉଭୟ ବିମାନ ପରସ୍ପର ଠାରୁ ମାତ୍ର କିଛି ସେକେଣ୍ଡର ଦୂରରେ ଥିଲେ । ଏହି ସମୟରେ ଉଭୟ ବିମାନରେ କୋଲିଜନ ଆଭଏଡାନ୍ସ ସିଷ୍ଟମ ଚାଲୁ ହୋଇଥିଲା। ଫଳରେ ବଡ଼ ଦୁର୍ଘଟଣାରୁ ଉଭୟ ବିମାନ ବର୍ତ୍ତି ଯାଇଥିଲା।
ଏଟିସିର ଜଣେ ଅଧିକାରୀଙ୍କ ସୂଚନା ଅନୁଯାୟୀ, ଏହି ଘଟଣାର ତଦନ୍ତ ଜାରି ରହିଛି । ଏହି ମାମଲାରେ ଜଣେ ଏଟିସି ଅଧିକାରୀଙ୍କୁ ନିଲମ୍ବିତ କରାଯାଇଛି । ପାକିସ୍ତାନ ନିଜର ଆକାଶ ମାର୍ଗ ବନ୍ଦ ରଖିବା କାରଣରୁ ମୁମ୍ବଇ ଆକାଶମାର୍ଗରେ ଟ୍ରାଫିକ ସମସ୍ୟା ବଢିଯାଇଛି । ସୋମବାର ପାକିସ୍ତାନ ନିଜ ଆକାଶମାର୍ଗ ଖୋଲିବ ବୋଲି ସୂଚନା ଦେଇଥିଲା । କିନ୍ତୁ ଏହା କେତେ ଦୂର ସତ ତାହା କାହାକୁ ଜଣାନାହିଁ ବୋଲି ଏଟିସିର ଅନ୍ୟ ଜଣେ ବରିଷ୍ଠ ଅଧିକାରୀ କହିଛନ୍ତି ।
