ନ୍ୟୁଜିଲାଣ୍ଡ: ନ୍ୟୁଜିଲାଣ୍ଡର କ୍ରାଏଷ୍ଟଚର୍ଚ୍ଚସ୍ଥିତ ୨ଟି ମସଜିଦରେ ଗଣହତ୍ୟାର ଶିକାର ହୋଇଛନ୍ତି ୪୦ରୁ ଊର୍ଦ୍ଧ୍ଵ ବ୍ୟକ୍ତି। ଏହି ଘଟଣାରେ ସମ୍ପୃକ୍ତ ଜଣେ ବନ୍ଧୁକଧାରୀ ବ୍ରେଣ୍ଟନ ଟେରଣ୍ଟ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ନିଜର ଆଦର୍ଶ ବୋଲି ଦର୍ଶାଇଛି। ଆକ୍ରମଣ ପୂର୍ବରୁ ସେ ଏକ ଇସ୍ତାହାର ଜାରି କରିଥିଲା, ଯେଉଁଥିରେ ସେ ଆକ୍ରମଣର ଉଦ୍ଦେଶ୍ୟ ସମ୍ପର୍କରେ ଉଲ୍ଲେଖ କରିଛି।
ଆତଙ୍କବାଦୀ ଆକ୍ରମଣରେ ହଜାର ହଜାର ୟୁରୋପୀୟଙ୍କ ମୃତ୍ୟୁର ପ୍ରତିଶୋଧ ନେବା, ଦେଶରେ ଶ୍ଵେତବର୍ଣ୍ଣ ଲୋକଙ୍କ ପ୍ରାଧାନ୍ୟ ବଜାୟ ରଖିବା ଏବଂ ପ୍ରବାସୀମାନଙ୍କୁ ଦେଶରୁ ବାହାର କରିବା ଉଦ୍ଦେଶ୍ୟରେ ସେ ଏହି ଆକ୍ରମଣ କରିଥିବା ଦର୍ଶାଇଛି।
ବ୍ରିଟେନର ପତ୍ରିକା ଦ ସନ୍ ଅନୁସାରେ, ଆକ୍ରମଣକାରୀ ବ୍ରେଣ୍ଟନ ନିଜ ଇସ୍ତାହାର ନାମ ‘ଦ ଗ୍ରେଟ ରିପ୍ଲେସମେଣ୍ଟ’ ରଖିଛି। ଇସ୍ତାହାରେ ଆକ୍ରମଣକାରୀ ଉଲ୍ଲେଖ କରିଛି ଯେ, ‘ଶ୍ଵେତ ବର୍ଣ୍ଣ ଲୋକଙ୍କ ଉପରେ ଆକ୍ରମଣ କରୁଥିବା ଲୋକଙ୍କୁ ଦେଖାଇବାକୁ ଚାହୁଁଛୁ ଯେ, ଆମ ଭୂମି କେବେ ବି ସେମାନଙ୍କ ଭୂମି ହୋଇପାରିବ ନାହିଁ। ଆମ ଘର ଆମ ନିଜର। ଯେପର୍ଯ୍ୟନ୍ତ ଜଣେ ଶ୍ଵେତବର୍ଣ୍ଣର ଲୋକ ବଞ୍ଚିଛି ସେପର୍ଯ୍ୟନ୍ତ ସେମାନେ କେବେ ବି ଜିତିପାରିବେ ନାହିଁ। ଏହି ଆକ୍ରମଣର ପରିଭାଷାକୁ ଦେଖିଲେ ଏହା ଏକ ଆତଙ୍କବାଦୀ ଆକ୍ରମଣ। କିନ୍ତୁ ଆମ ଦେଶକୁ କବ୍ଜା କରୁଥିବା ବ୍ୟକ୍ତିଙ୍କ ବିରୋଧରେ ଏହା ଏକ କାର୍ଯ୍ୟାନୁଷ୍ଠାନ ବୋଲି ମୁଁ ମାନୁଛି’ ବୋଲି ବ୍ରେଣ୍ଟନ ୮୭ ପୃଷ୍ଠାର ଏହି ଇସ୍ତାହାରରେ ଲେଖିଛି।
