ନୂଆଦିଲ୍ଲୀ: ୨୦୧୯ ସଧାରଣ ନିର୍ବାଚନ ପାଇଁ ରବିବାର ସନ୍ଧ୍ୟାରେ ନିର୍ବାଚନ ତାରିଖ ଘୋଷଣା ହୋଇପାରେ । ଆଜି ସନ୍ଧ୍ୟା ୫ଟାରେ ବିଜ୍ଞାନ ଭବନରେ ଭାରତୀୟ ନିର୍ବାଚନ କମିଶନ ସାମ୍ବାଦିକ ସମ୍ମିଳନୀ ଡକାଇଛନ୍ତି । ଏହି ବୈଠକରେ ମୁଖ୍ୟ ନିର୍ବାଚନ କମିଶନର ସୁନୀଲ ଆରୋଡାଙ୍କ ସମେତ ଅନ୍ୟ ନିର୍ବାଚନ ଆୟୁକ୍ତ ମଧ୍ୟ ଉପସ୍ଥିତ ରହିବେ । ଓଡିଶା, ଆନ୍ଧ୍ରପ୍ରଦେଶ, ସିକିମ, ଅରୁଣାଚଳ ପ୍ରଦେଶ ଓ ଜମ୍ମୁ କଶ୍ମୀର ୫ଟି ରାଜ୍ୟରେ ବିଧାନସଭା ନିର୍ବାଚନର ତାରିଖ ଘୋଷଣା ହୋଇପାରେ । ୭ରୁ ୯ଟି ପର୍ଯ୍ୟାୟରେ ଲୋକସଭା ନିର୍ବାଚନ ହେବାର ସମ୍ଭାବନା ରହିଛି । ଏପ୍ରିଲ୍ ୧୦ ରୁ ଆରମ୍ଭ ହୋଇ ମେ ମାସ ମଧ୍ୟରେ ଭୋଟ୍ ଗ୍ରହଣ ଶେଷ ହେବ ବୋଲି ଆଶା କରାଯାଉଛି । ଚଳିତ ଲୋକସଭାର କାର୍ଯ୍ୟକାଳ ଜୁନ ମାସରେ ଶେଷ ହେଉଛି ।
ସୂଚନାଯୋଗ୍ୟ, ୨୦୦୪ରେ ୨୯ ଫେବୃଆରୀ, ୨୦୦୯ରେ ମାର୍ଚ୍ଚ ୨, ୨୦୧୪ରେ ମାର୍ଚ୍ଚ ୫ ତାରିଖରେ ଅଧିସୂଚନା ଜାରି ହୋଇଥିଲା । କିନ୍ତୁ ଚଳିତ ବର୍ଷ ନିର୍ବାଚନ ତାରିଖ ଘୋଷଣା ହେବାରେ ବିଳମ୍ବ ହୋଇଥିବା ଦେଖିବାକୁ ମିଳିଛି । ୨୦୦୪ରେ ଜୁନ ୧ରେ, ୨୦୦୯ ମାର୍ଚ୍ଚ ୩୦ରେ ଏବଂ ୨୦୧୪ ଜୁନ ୩ ରେ ଲୋକସଭାର କାର୍ଯ୍ୟକାଳ ଶେଷ ହୋଇଥିଲା । ୨୦୦୪ ନିର୍ବାଚନରେ ଏପ୍ରିଲ ୨ ରୁ ମେ ୧୦ ତାରିଖ ମଧ୍ୟରେ ୪ଟି ପର୍ଯ୍ୟାୟରେ, ୨୦୦୯ରେ ଏପ୍ରିଲ ୧୬ ରୁ ମେ ୧୩ ମଧ୍ୟରେ ୫ଟି ପର୍ଯ୍ୟାୟରେ ଏବଂ ୨୦୧୪ରେ ଏପ୍ରିଲ ୭ରୁ ମେ ୧୨ ମଧ୍ୟରେ ୯ଟି ପର୍ଯ୍ୟାୟରେ ନିର୍ବାଚନ ଶେଷ ହୋଇଥିଲା।
