ସମାଜ ଲାଇଭ ଡ଼େସ୍କ : ମଧ୍ୟପ୍ରଦେଶର ସିଓନିରେ ଏକ ତାଲିମ ବିମାନ ୩୩କେଭି ବିଦ୍ୟୁତ୍ ତାରରେ ଆଘାତ ପାଇବା ପରେ ଦୁର୍ଘଟଣାଗ୍ରସ୍ତ ହୋଇଛି । ଫଳରେ ପାଇଲଟ୍ ଏବଂ ଅନ୍ୟ ଜଣେ ଯାତ୍ରୀ ଆହତ ହୋଇଛନ୍ତି ।
ସୂଚନା ଅନୁସାରେ, ରେଡୱାର୍ଡ ଆଭିଏସନ୍ କମ୍ପାନୀର ବିମାନଟି ସନ୍ଧ୍ୟା ୬:୨୫ ଦୁର୍ଘଟଣା ହୋଇଛି । ସିଓନି-ନାଗପୁର ଜାତୀୟ ରାଜପଥ ସୁକତାରା ଏୟାରଷ୍ଟ୍ରିପ୍ ଠାରୁ ପ୍ରାୟ ଦୁଇ କିଲୋମିଟର ଦୂରରେ ଆମାଗୋନ୍ର କ୍ଷେତ ନିକଟରେ ଦୁର୍ଘଟଣାଗ୍ରସ୍ତ ହୋଇଛି । ପାଇଲଟ୍ ଅଜିତ ଚାଭଡା ଏବଂ ଅନ୍ୟ ଜଣେ ଯାତ୍ରୀ ଆହତ ହୋଇଥିବା ସୂଚନା ମିଳିଛି । ଦୁର୍ଘଟଣା ପରେ ସେମାନଙ୍କୁ ବିଦ୍ୟୁତ୍ କମ୍ପାନୀ କର୍ମଚାରୀ, ଗ୍ରାମବାସୀ ଏବଂ ପୋଲିସ ଉଦ୍ଧାର କରିଛନ୍ତି । ଦୁଇଜଣ ବାରପଥରର ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅଛନ୍ତି ଏବଂ ଉଭୟଙ୍କ ସ୍ବାସ୍ଥ୍ୟବସ୍ଥା ସ୍ଥିର ଥିବା ଜଣେ ଅଧିକାରୀ କହିଛନ୍ତି ।
ପ୍ରତ୍ୟକ୍ଷଦର୍ଶୀଙ୍କ ଅନୁଯାୟୀ, ଅବତରଣ କରିବା ସମୟରେ ବିମାନର ତଳ ଭାଗ ୩୩ କେଭି ବିଦ୍ୟୁତ୍ ତାରରେ ଆଘାତ ପାଇଥିଲା । ଫଳରେ ବିଦ୍ୟୁତ୍ ତାର ଛିଣ୍ଡିଯାଇଥିଲା ଏବଂ ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା । ବିଦ୍ୟୁତ ତାର ଛିଣ୍ଡିଯିବା ଫଳରେ ବିଦ୍ୟୁତ ସରବରାହ ବନ୍ଦ ହୋଇଥିଲା ଫଳରେ ଏକ ବଡ଼ ଦୁର୍ଘଟଣାରୁ ଉଭୟ ବଞ୍ଚି ଯାଇଥିବା ଅଧିକାରୀ ଜଣକ କହିଛନ୍ତି।
