ଭୋପାଳ: ମଧ୍ୟପ୍ରଦେଶ ସରକାର ରାଜ୍ୟର ଶତାଧିକ ଅଙ୍ଗନବାଡିର ଆଧୁନିକୀକରଣ ପାଇଁ ‘ସକ୍ଷମ ଅଙ୍ଗନବାଡି’ କାର୍ଯ୍ୟକ୍ରମ ହାତକୁ ନେଇଛନ୍ତି। ଏଥିପାଇଁ ଉମାରିଆ ଜିଲାରେ ଥିବା ୧୧୬ ଅଙ୍ଗନବାଡି କେନ୍ଦ୍ରକୁ ଏଲଇଡି ଟିଭି ଓ ୱାଟର ଫିଲଟର ଯୋଗାଇ ଦିଆଯାଇଛି। ତେବେ ସବୁଠାରୁ ଅାଶ୍ଚର୍ଯ୍ୟଜନକ ଘଟଣା ହେଉଛି ଏଥିମଧ୍ୟରୁ ଗୋଟିଏ ହେଲେ ଅଙ୍ଗନବାଡି କେନ୍ଦ୍ରରେ ବିଜୁଳି କିମ୍ବା ଜଳ ଯୋଗାଣ ବ୍ୟବସ୍ଥା ନଥିବା ଜଣାପଡିଛି। ଉମାରିଆ ଜିଲାରେ ମୋଟ ୭୮୬ଟି ଅଙ୍ଗନବାଡି କେନ୍ଦ୍ର ଥିବାବେଳେ ଏଥିମଧ୍ୟରୁ ୩୨୨ କେନ୍ଦ୍ରରେ ବିଦ୍ୟୁତ୍ ସଂଯୋଗ ନାହିଁ।
ଏହି ପରିପ୍ରେକ୍ଷୀରେ ଉପରୋକ୍ତ ୧୧୬ଟି କେନ୍ଦ୍ରକୁ କିଭଳି ଯୋଗ୍ୟ ବିବେଚନା କରାଗଲା, ତାହା ଏକ ବିରାଟ ପ୍ରଶ୍ନବାଚୀ ସୃଷ୍ଟି କରିଛି। ବର୍ତ୍ତମାନ ଟିଭି ଓ ୱାଟର ଫିଲଟରଗୁଡିକୁ ଯତ୍ନ ସହକାରେ ସାଇତି ରଖାଯାଇଛି। ବିଦ୍ୟୁତ୍ ସଂଯୋଗ ହେବାପରେ ଏଗୁଡିକୁ ବ୍ୟବହାର କରାଯିବ ବୋଲି ସିଡିପିଓ କହିଛନ୍ତି। ଏହି କେନ୍ଦ୍ରଗୁଡିକୁ ତୁରନ୍ତ ବିଦ୍ୟୁତ୍ ଓ ପାନୀୟ ଜଳ ଯୋଗାଣ ବ୍ୟବସ୍ଥା କରିବାକୁ ରାଜ୍ୟ ବିଦ୍ୟୁତ୍ ବୋର୍ଡ ସହ ଯୋଗାଯୋଗ କରାଯାଉଥିବା ସିଡିପିଓ କହିଛନ୍ତି।
