ଆମେରିକା : ଲସ୍ ଏଞ୍ଜେଲିସ୍ ରାସ୍ତାରେ ଖଣ୍ଡା ବୁଲାଉଥିବା ଜଣେ ଶିଖ ଯୁବକଙ୍କୁ ପୋଲିସ ଗୁଳି ମାରିଛି । ଯୁବକ ଜଣକ ସଡ଼କରେ ପ୍ରାଚୀନ ମାର୍ଶଲ ଆର୍ଟ ପ୍ରଦର୍ଶନ କରୁଥିଲେ । ଘଟଣାଟି ଜୁଲାଇ ୧୩ ରେ ଘଟିଥିଲା । ୩୫ ବର୍ଷୀୟ ଗୁରପ୍ରିତ୍ ସିଂ ଲସ୍ ଏଞ୍ଜେଲିସ୍ ଡାଉନ ଡାଉନର କ୍ରିପ୍ଟ ଡଟ କମର ଏରିନା ପାଖେ ମାର୍ଶଲ ଆର୍ଟ ପ୍ରଦର୍ଶନ କରୁଥିବା ସମୟରେ ପୋଲିସ ତାଙ୍କୁ ଏଥିରୁ ବିରତ ରହିବାକୁ ନିର୍ଦ୍ଦେଶ ଦେଇଥିଲା । ପୋଲିସ ସୂଚନା ଅନୁସାରେ ତାଙ୍କ ହାତରେ ଖଣ୍ଡା ଭଳି ଏକ ଅସ୍ତ୍ର ଥିଲା । ପ୍ରାୟ ୨ ଫୁଟର ଏହି ଅସ୍ତ୍ର ବୁଲାଇ ସେ ଭୟଭୀତ କରାଉଥିବା ପୋଲିସ ସୂଚନା ଦେଇଥିଲା ।
ପୋଲିସ ବିଭାଗ ତରଫରୁ ଜାରି ହୋଇଥିବା ଭିଡ଼ିଓରୁ ଜଣା ପଡିଛି କି ପଗଡି ପିନ୍ଧିଥିବା ଶିଖ ଯୁବକଜଣକ ରାସ୍ତାରେ ଖଣ୍ଡା ବୁଲାଉଥିଲେ । ଘଟଣାସ୍ଥଳରେ ପୋଲିସ ପହଞ୍ଚି ଶିଖ ଯୁବକଙ୍କୁ ଖଣ୍ଡା ତଳକୁ କରିବାକୁ କହିବା ପରେ ବି ସେ ତଳକୁ କରିନଥିଲେ । ଏହା ସହ ସେ ସେଥିରେ ନିଜ ଜିଭ କାଟିଥିଲେ ଏବଂ ଏକ କାରରେ ସେହି ସ୍ଥାନରୁ ଫେରାର ହେବାକୁ ଚେଷ୍ଟା କରିଥିଲେ । ପୋଲିସ ତାଙ୍କ ପଛରେ ଯିବା ପରେ ସେ କାର ବାହାରକୁ ଖଣ୍ଡା ହଲାଇ ରାସ୍ତାରେ ଥିବା ସମସ୍ତଙ୍କୁ ଡରାଇବାକୁ ଚେଷ୍ଟା କରିବା ସହିତ ପୋଲିସକୁ ଘଉଡାଇବାକୁ ଉଦ୍ୟମ କରିଥିଲେ । ଏପରିକି ସେ ଏକ କାଚ ବୋତଲ ପୋଲିସ ଉପରକୁ ଫିଙ୍ଗିଥିଲେ । ରାସ୍ତାରେ ଅନେକ ଗାଡିକୁ ଧକ୍କା ଦେଇ ଶେଷରେ ସେ ଅଟକିଯାଇଥିଲେ । ତାଙ୍କୁ ଅସ୍ତ୍ର ତଳକୁ କରିବାକୁ ପରାମର୍ଶ ଦେବା ପରେ ବି ସେ ପୋଲିସ କଥା ଶୁଣିନଥିଲେ । ପୋଲିସକୁ ଖଣ୍ଡାରେ ଆକ୍ରମଣ କରିବାକୁ ଉଦ୍ୟମ କରିବା ସମୟରେ ପୋଲିସ ତାଙ୍କ ଉପରକୁ ଗୁଳି ଚଳାଇଥିଲା । ତାଙ୍କୁ ଗୁରୁତର ଅବସ୍ଥାରେ ମେଡିକାଲ ନିଆଯିବା ସମୟରେ ତାଙ୍କର ମୃତ୍ୟୁ ଘଟିଥିଲା ।
