ହସ୍ତୀ ଦିବସରେ ଡାକ ବିଭାଗର ସ୍ଵତନ୍ତ୍ର ରଦ୍ଦିକରଣ ମୋହର ଉନ୍ମୋଚିତ

ଆଠଗଡ: ବିଶ୍ବ ହସ୍ତୀ ଦିବସ ଅବସରରେ ଆଠଗଡ ପ୍ରଧାନ ଡାକଘରଠାରେ ଡାକ ବିଭାଗର ହାତୀ ଛବି ସମ୍ବଳିତ ଏକ ସ୍ଵତନ୍ତ୍ର ରଦ୍ଦିକରଣ ମୋହର ବା କ୍ୟାନସେଲେସନ ଷ୍ଟାମ୍ପ ଉନ୍ମୋଚିତ ହୋଇଯାଇଛି । ଏଥିସହିତ ପ୍ରଧାନ ଡାକଘରେ ହାତୀ ଉପରେ ପର୍ଯ୍ୟବେସିତ ଏକ ଡାକ ଟିକଟ ପ୍ରଦର୍ଶନୀ ମଧ୍ୟ ଆୟୋଜିତ ହୋଇଯାଇଛି । ଆଠଗଡ ବନଖଣ୍ଡରେ ହାତୀଙ୍କ ଅବସ୍ଥାନ ଓ ଚଳପ୍ରଚଳ ଅଧିକ ହୋଇଥିବାରୁ ଏବଂ ହାତୀ ବଂଶର ସୁରକ୍ଷା ପାଇଁ ସଚେତନତା ଉଦ୍ଦେଶ୍ୟରେ କଟକ ଦକ୍ଷିଣ ଡାକ ମଣ୍ଡଳ ପକ୍ଷରୁ ଏହି କାର୍ଯ୍ୟକ୍ରମ ଆଠଗଡରେ ଆୟୋଜନ ହୋଇଥିଲା । ଏହି ସ୍ଵତନ୍ତ୍ର ଷ୍ଟାମ୍ପ ଉନ୍ମୋଚନ ଉତ୍ସବରେ ମୁଖ୍ୟ ଅତିଥି ଭାବେ ଆଠଗଡ ଡିଏଫଓ ଡାକ୍ତର ଯଜ୍ଞଦତ୍ତ ପତି, ସମ୍ମାନିତ ଅତିଥି ଭାବେ ଗୋପବନ୍ଧୁ ବିଜ୍ଞାନ କଲେଜ ଅଧ୍ୟକ୍ଷ ଡ.ଲୋକନାଥ ସାହୁ, ଅବସରପ୍ରାପ୍ତ ବରିଷ୍ଠ ଡାକ ଅଧିକ୍ଷକ ସର୍ବେଶ୍ୱର ମିଶ୍ର, କଟକ ଦକ୍ଷିଣ ମଣ୍ଡଳ ଡାକ ଅଧିକ୍ଷକ ପରମେଶ୍ବର ନାୟକ, ଅଭିଜ୍ଞ ଡାକଟିକଟ ସଂଗ୍ରହକାରୀ ସକ୍କିଲ ମହମ୍ମଦ ଓ ଅଜିତ ରାଉତ ପ୍ରମୁଖ ଯୋଗ ଦେଇଥିଲେ । ହାତୀ ଆମ ପରିବେଶ ପାଇଁ ଉପକାରୀ ଏବଂ ଜୈବ ବିବିଧତାର ସୁରକ୍ଷା ପାଇଁ ହାତୀ ବଂଶର ସୁରକ୍ଷା ନିତ୍ୟାନ୍ତ ଆବଶ୍ୟକ ବୋଲି ଅତିଥିଗଣ ମତବ୍ୟକ୍ତ କରିଥିଲେ । ଡାକ ବିଭାଗ ପକ୍ଷରୁ ହାତୀଙ୍କ ସୁରକ୍ଷା ଓ ବଂଶ ବୃଦ୍ଧି ପାଇଁ ଏହି ସ୍ବତନ୍ତ୍ର ରଦ୍ଦିକରଣ ମୋହର ବ୍ୟବହାର ଜନସାଧାରଣଙ୍କ ମଧ୍ୟରେ ସଚେତନତା ବୃଦ୍ଧିରେ ସହାୟକ ହେବ ବୋଲି ଅତିଥିମାନେ ଆଶାବ୍ୟକ୍ତ କରିଥିଲେ । ଏହି ସ୍ଵତନ୍ତ୍ର ଡାକ ରଦ୍ଦିକରଣ ମୋହର ପ୍ରସ୍ତୁତ କରିଥିବା ଡାକଟିକଟ ସଂଗ୍ରହକାରୀ ଅଜିତ ରାଉତଙ୍କୁ ସମ୍ବର୍ଦ୍ଧିତ କରାଯାଇଥିଲା । କଟକ ଦକ୍ଷିଣ ଡାକ ମଣ୍ଡଳ ନିରୀକ୍ଷକ ବିକାଶ ପରିଡାଙ୍କ ସଂଯୋଜନାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଡାକ ନିରୀକ୍ଷକ ଅମୂଲ୍ୟ ରଥ ଓ ଆଠଗଡ ପ୍ରଧାନ ଡାକଘରର ଡାକପାଳ ମନୋରଞ୍ଜନ ସ୍ଵାଇଁ ଏବଂ ଅନ୍ୟ ସମସ୍ତ ଅଧିକାରୀ ଓ କର୍ମଚାରୀ ଉପସ୍ଥିତ ରହି ସହଯୋଗ କରିଥିଲେ । ଡାକ ନିରୀକ୍ଷକ ଅମୂଲ୍ୟ ରଥ ଶେଷରେ ଧନ୍ୟବାଦ ଅର୍ପଣ କରିଥିଲେ ।