ଗୁଆହାଟୀ: ଟିଭି ଚ୍ୟାନେଲରେ ଲାଇଭ୍ ପ୍ରସାରଣ ଚାଲିଥିବାବେଳେ ଆସାମସ୍ଥିତ କାମାକ୍ଷା ମନ୍ଦିରରେ ନରବଳି ଦିଆଯାଉଛି ବୋଲି ପ୍ରସଙ୍ଗ ଉତ୍ଥାପନ କରିଥିବାରୁ ଜଣେ ଟିଭି ଉପସ୍ଥାପିକାଙ୍କୁ ଅଡୁଆ ସ୍ଥିତିର ସମ୍ମୁଖୀନ ହେବାକୁ ପଡିଛି। ଆସାମ ପୁଲିସ ଏହି ଘଟଣାରେ ସଂପୃକ୍ତ ଉପସ୍ଥାପିକା ଏବଂ ସୃଷ୍ଟି ରଘୁବଂଶୀ ନାମ୍ନୀ ମହିଳାଙ୍କୁ ସମନ ଜାରି କରିଛି। ସୂଚନାଯୋଗ୍ୟ ସୃଷ୍ଟି ହେଉଛନ୍ତି ମେଘାଳୟରେ ହତ୍ୟାର ଶିକାର ହୋଇଥିବା ରାଜା ରଘୁବଂଶୀଙ୍କ ସମ୍ପର୍କୀୟ ଭଉଣୀ। ଏଭଳି ଦାୟିତ୍ବହୀନ ମନ୍ତବ୍ୟ ଦେଇ ହିନ୍ଦୁ ଧର୍ମାବଲମ୍ବୀଙ୍କ ଧାର୍ମିକ ଭାବନାକୁ କ୍ଷୁଣ୍ଣ କରିଥିବାରୁ ଦୁଇ ଅଭିଯୁକ୍ତଙ୍କୁ ଜୁଲାଇ ୨୩ ଓ ୨୪ରେ ଗୁଆହାଟୀ ପୁଲିସ ନିକଟରେ ହାଜର ହେବାକୁ ନିର୍ଦେଶ ଦିଆଯାଇଛି। ସୂଚନାଯୋଗ୍ୟ ମେଘାଳୟରେ ରାଜା ରଘୁବଂଶୀଙ୍କ ଅନ୍ତର୍ଦ୍ଧାନ ପ୍ରସଙ୍ଗ ନେଇ ଉପସ୍ଥାପିକା ଜଣକ ସୃଷ୍ଟିକୁ ପ୍ରଶ୍ନ କରିଥିଲେ। କାମାକ୍ଷା ମନ୍ଦିରରେ ନରବଳି ପ୍ରଥା ଚାଲିଥିବାରୁ ସମ୍ଭବତଃ ରାଜା ଏହାର ଶିକାର ହୋଇଥାଇପାରନ୍ତି ବୋଲି ଉପସ୍ଥାପିକା କହିଥିବାବେଳେ ସୃଷ୍ଟି ଏହାକୁ ସମର୍ଥନ କରିଥିଲେ। ଅବଶ୍ୟ ପରବର୍ତ୍ତୀ ସମୟରେ ରାଜାଙ୍କୁ ତାଙ୍କ ପତ୍ନୀ ସୋନମ ରଘୁବଂଶୀ ସୁପାରି କିଲରଙ୍କ ସହାୟତାରେ ହତ୍ୟା କରିଥିବା ଜଣାପଡିଥିଲା। ପୁଲିସ ଏହି ଘଟଣାରେ ସୋନମ, ପ୍ରେମିକ ରାଜ୍ କୁଶୱାହା ଏବଂ ତିନିଜଣ ସୁପାରି କିଲରଙ୍କୁ ଗିରଫ କରିସାରିଛି।
Popular Categories
Previous article
Next article