ଗଞ୍ଜାମ : ଗଞ୍ଜାମ ଥାନା ପୋଲିସକୁ ମିଳିଛି ଆଉ ଏକ ବଡ଼ ସଫଳତା। ଗଞ୍ଜାମ ସହର ବଡ଼ ବଜାରଠାରେ ଥିବା ଶ୍ରଦ୍ଧା ଜୁଏଲ ସୁନା ଦୋକାନରେ ଗତ କାଲି ବିଳମ୍ବିତ ରାତିରେ ଏକ ଆଠ ଜଣିଆ ଚୋର ଗ୍ୟାଙ୍ଗ ଚୋରି କରିବାକୁ ଉଦ୍ୟମ କରୁଥିବା ବେଳେ ତାହା ଫସର ଫାଟିଯାଇଛି । ସୁନା ଦୋକାନୀ ମାଲିକ ଲିଣ୍ଟୁ ସୁବୁଦ୍ଧି ହଟାତଶବ୍ଦ ଶୁଣି ଉଠି ପଡିବା ସହ ଚୋର ମାନଙ୍କୁ ଗୋଡ଼ାଇଥିଲେ। ସଙ୍ଗେ ସଙ୍ଗେ ଗଞ୍ଜାମ ଥାନା ଆଇଆଇସି ସୁମିତ୍ରା ପାତ୍ରଙ୍କୁ ଏନେଇ ଅବଗତ କରାଇଥିଲେ । ଖବର ପାଇ ଆଇଆଇସି ପାତ୍ରଙ୍କ ସମେତ ଏସ ଆଇ ଅନିରୁଦ୍ଧ ସ୍ୱାଇଁ, ଅନନ୍ତ ରାଓ,ମହିଳା ଏସ ଆଇ ସୁପ୍ରଭା ସାହୁ ପ୍ରମୁଖ ସଦଳବଳେ ଘଟଣା ସ୍ଥଳରେ ପହଂଚି ଚାରିଆଡେ ଖୋଜା ଖୋଜି କରିଥିଲେ । ଦୀର୍ଘ ସମୟପରେ ଚୋର ମାନେ ଜାତୀୟ ରାଜପଥ ଦେଇ ଦୌଡ଼ି ପଳାଉଥିବାବେଳେ ଚାରିଜଣଙ୍କୁ ପୋଲିସ ମାଡି ବସିଥିଲା । ପରେ ସେମାନଂକୁ ଥାନାକୁ ଅଣାଯାଇଥିଲା ।
ଗିରଫ ବ୍ୟକ୍ତି ମାନେ ହେଲେ ଅରବିନ୍ଦ ପାରଧି (୨୭), ବିଜୟ କାମଳକାର(୪୦),ରୋହିତ ପାରଧି (୨୧)ଏବଂ ଲାଜନୀ ପିମ୍ପି ୨୨ ବର୍ଷ । ଗିରଫ ଚୋର ମାନେ ସବୁ ଫେରିବାଲା ବୋଲି ପୋଲିସ ସାମ୍ବାଦିକ ସମ୍ମିଳନୀ ଜରିଆରେ ସୂଚନା ଦେଇଛି । ଏନେଇ ପୋଲିସ କେସ ନଂ ୧୪୨/୨୫ ରେ ମାମଲା ରୁଜୁ କରିବା ସହ ସମସ୍ତ ଅଭିଯୁକ୍ତଙ୍କୁ ମଙ୍ଗଳବାର ସନ୍ଧ୍ୟାରେ କୋର୍ଟ ଚାଲାଣ କରାଯାଇଥିବା ଆଇଆଇସି ସୁମିତ୍ରା ପାତ୍ର ସୂଚନା ଦେଇଛନ୍ତି । ଏମାନଙ୍କ ଘର ରାଜସ୍ତାନ ଓ ମଧ୍ୟପ୍ରଦେଶ ବୋଲି ଗଞ୍ଜାମ ଥାନା ପୋଲିସ ପକ୍ଷରୁ କୁହାଯାଇଛି । ପୋଲିସ ସୂଚନା ଅନୁଯାୟୀ ଏମାନେ ସବୁ ବ୍ରହ୍ମପୁରରେ ରହି ଦିନରେ ବେଲୁନ, ପୁରୁଣା ଘଣ୍ଟା ମୋବାଇଲ ଓ ବ୍ୟାଟେରୀ ଆଦି ମରାମତି ଆଳରେ ବଡ଼ ବଡ଼ ଦୋକାନ ଗୁଡିକୁ ଲକ୍ଷ କରି ରାତିରେ ଚୋରି କରିଥାନ୍ତି ।
