ଗୋପାଳପୁର: ବ୍ରହ୍ମପୁର ବିଶ୍ବବିଦ୍ୟାଳୟ ନୂତନ ଛାତ୍ରାବାସର ଛାତ୍ରମାନେ ବାୟୁ ପ୍ରଦୂଷଣର ସମସ୍ୟାକୁ ନେଇ କୁଳପତି ପ୍ରଫେସର ଗୀତାଞ୍ଜଳି ଦାଶଙ୍କ ଉଦେଶ୍ୟରେ ଏକ ଦାବିପତ୍ର କୁଳସଚିବ ସଚ୍ଚିଦାନନ୍ଦ ନାୟକଙ୍କ ଜରିଆରେ ପ୍ରଦାନ କରିଛନ୍ତି। ସୂଚନା ପ୍ରକାରେ, ନୂତନ ଛାତ୍ରାବାସଠାରୁ ମାତ୍ର ୧୦୦ ମିଟର ଦୂରରେ ବିମାନ ବନ୍ଦର ରନ ୱେ ଏବଂ ରାସ୍ତା କାମ ଚାଲିଥିବା ଯୋଗୁଁଁ ସେଠାରେ ତାରୁ ଓ ଗୋଡ଼ି ମିଶାଇବା ପାଇଁ ମେସିନ ଠିକାଦାର ପକ୍ଷରୁ ସ୍ଥାପନ କରାଯାଇଛି। ତାରୁ ଗରମ ହେବା ସମୟରେ କଳା ଧୂଆଁ ଏବଂ ଗୋଡ଼ି ଢ଼ାଳିବା ସମୟରେ ଧୂସର ଯୋଗୁଁଁ ବାୟୁ ମଣ୍ଡଳ ପ୍ରଦୂଷଣ ହେବା ସହ ଉଚ୍ଚ ଶବ୍ଦ ଯୋଗୁଁଁ ହଷ୍ଟେଲରେ ରହୁଥିବା ଛାତ୍ରମାନେ ବହୁ ଅସୁବିଧାରେ ସମ୍ମୁଖୀନ ହେଉଛନ୍ତି। ପବନ ଯୋଗୁଁଁ ସେଠାରେ ଥିବା ପ୍ରାୟ ୮ଟି ହଷ୍ଟେଲର ଛାତ୍ରମାନେ ଶ୍ୱାସକ୍ରିୟାରେ ସମସ୍ୟା, ଆଖିରେ ଧୂଳି ପଡ଼ିବା ଏବଂ ପାଠପଢ଼ାରେ ବାଧା ସୃଷ୍ଟି ହେଉଥିବାରୁ ଏ ନେଇ ଦାବିପତ୍ର ପ୍ରଦାନ କରିଛନ୍ତି।
ବିଶ୍ବବିଦ୍ୟାଳୟ କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେଇ ସମସ୍ୟାର ସମାଧାନ କରିବାକୁ ଛାତ୍ରମାନେ ଦାବି କରିଛନ୍ତି। ଏଥିସହ ସେହି ମେସିନଟିକୁ ସ୍ଥାନାନ୍ତର କରିବାକୁ ନିବେଦନ କରିଛନ୍ତି। ଏ ନେଇ କୁଳପତି ପ୍ରଫେସର ଗୀତାଞ୍ଜଳି ଦାଶଙ୍କ ସହ ଯୋଗାଯୋଗବେଳେ ସେଠାରେ ରହୁଥିବା ୮ଟି ଛାତ୍ରାବାସର ପ୍ରାୟ ଏକ ହଜାର ଛାତ୍ର ରହୁଥିବାରୁ ତାଙ୍କର ସ୍ୱାସ୍ଥ୍ୟ ଓ ପାଠପଢ଼ାଜୁ ଦୃଷ୍ଟିରେ ରଖି ଏହାର କିଭଳି ସମାଧାନ ହେବ ସେଥିପ୍ରତି ଦୃଷ୍ଟି ଦେବେ ବୋଲି କହିଛନ୍ତି।
