ବିଜାପୁର: ଛତିଶଗଡ଼ର ବିଜାପୁର ଜିଲାରେ ପୁଣି ଥରେ ନକ୍ସଲଙ୍କ ଦ୍ଵାରା ଖଞ୍ଜା ଯାଇଥିବା ଆଇଇଡି ସଂସ୍ପର୍ଶରେ ଆସି ଆହତ ହୋଇଛନ୍ତି ଯବାନ। ବିସ୍ଫୋରଣରେ ସୁରକ୍ଷାବାହିନୀର ୨ ଜଣ ଯବାନ ଆହତ ହୋଇଛନ୍ତି। ଆହତଙ୍କୁ ଚିକିତ୍ସା ପାଇଁ ବିଜାପୁର ହସ୍ପିଟାଲରେ ଭର୍ତ୍ତି କରାଯାଇଛି। ଆହତ ଯବାନଙ୍କ ନାମ ମୃଦୁଲ୍ ବର୍ମନ ଓ ମହମ୍ମଦ ଇସହାକ ଏବଂ ଦୁହେଁ କୋବ୍ରା ୟୁନିଟ୍ର ବୋଲି ଜଣାପଡ଼ିଛି। ଉଭୟଙ୍କ ଗୋଡ଼ରେ ଆଘାତ ଲାଗିଛି।
ସୂଚନା ଅନୁସାରେ, ଜିଲାର ବାସାଗୁଡ଼ା ଥାନା ଅନ୍ତର୍ଗତ ପୁତକେଲ କ୍ୟାମ୍ପରୁ ସିଆରପିଏଫ ଓ କୋବ୍ରାର ଏକ ମିଳିତ ଦଳ କ୍ଷେତ୍ର ପରିଦର୍ଶନରେ ବାହାରିଥିବା ସମୟରେ ମାଓବାଦୀଙ୍କ ଦ୍ଵାରା ଖଞ୍ଜା ଯାଇଥିବା ଆଇଇଡି ବିସ୍ଫୋରଣ ହୋଇଥିଲା। ଫଳରେ ୨ ଜଣ ଯବାନ ଆହତ ହୋଇଥିଲେ।
ସୂଚନାଯୋଗ୍ୟ, ଜାନୁଆରୀ ୧୨ ତାରିଖରେ ଜାଙ୍ଗଲା ଥାନା ଅନ୍ତର୍ଗତ ଜୈଗୁର ନିକଟରେ ନକ୍ସଲଙ୍କ ଦ୍ଵାରା ଆଇଇଡି ଖଞ୍ଜା ଯାଇଥିଲା। ଏହି ଆଇଇଡି ବିସ୍ଫୋରଣରେ ଡିଆରଜିର ୨ ଜଣ ଯବାନ ଆହତ ହୋଇଥିଲେ। ସେମାନଙ୍କୁ ଅଧିକ ଚିକିତ୍ସା ପାଇଁ ରାୟପୁର ସ୍ଥାନାନ୍ତର କରାଯାଇଛି।
