ନୂଆଦିଲ୍ଲୀ : ଏଣିକି ଆପଣ ଏୟାର ଇଣ୍ଡିଆର ଉଡାଣରେ ଇଣ୍ଟରନେଟ୍ ବ୍ୟବହାର କରିପାରିବେ । ଉଭୟ ଘରୋଇ ଏବଂ ଅନ୍ତର୍ଜାତୀୟ ଉଡାଣରେ ଓ୍ବାଇ-ଫାଇ ସେବା ଆରମ୍ଭ ହୋଇଯାଇଛି । ଏହି ସେବା ଏୟାରବସ୍ ଏ୩୫୦, ବୋଇଂ ୭୮୭-୯ ଏବଂ କିଛି ବଛା ବଛା ଏୟାରବସ୍ ଏ୩୨୧ନିଓ ବିମାନରେ ଉପଲବ୍ଧ ହେବ । ଏୟାର ଇଣ୍ଡିଆ ଭାରତରେ ଘରୋଇ ଉଡାଣରେ ଓ୍ବାଇ-ଫାଇ ସେବା ଦେଉଥିବା ପ୍ରଥମ ଏୟାରଲାଇନ୍ ପାଲଟିଛି । କହିରଖୁଛୁ ଏଲନ ମସ୍କଙ୍କ ଷ୍ଟାରଲିଙ୍କ୍ ଆସିବା ପୂର୍ବରୁ ଏୟାର ଇଣ୍ଡିଆ ଏହି କାରନାମା କରିଦେଖାଇଛି ।
ଏୟାର ଇଣ୍ଡିଆର ଉଡାଣରେ ଯାତ୍ରୀ ଏହି ସେବା ବ୍ୟବହାର କରି ସାମାଜିକ ଗଣମାଧ୍ୟମ ଓ ମେସେଜିଂ ଆପ୍ ପର୍ଯ୍ୟନ୍ତ ପହଞ୍ଚି ପାରିବେ ଏବଂ କନେକ୍ଟେଡ୍ ରହିପାରିବେ । ଓ୍ବାଇ-ଫାଇର ବ୍ୟବହାର ଲାପଟପ୍, ଟାବଲେଟ୍ ଓ ସ୍ମାର୍ଟଫୋନ୍ ଭଳି ଉପକରଣରେ କରାଯାଇହେବ ଯାହା ଆଇଓଏସ୍ ଓ ଆଣ୍ଡ୍ରଏଡ୍ ଅପରେଟିଂ ସିଷ୍ଟମରେ ଚାଲିଥାଏ । ଏହା ବ୍ୟତୀତ ଯାତ୍ରୀ ୧୦ ହଜାର ଫୁଟ ଉଚ୍ଚତାରେ ଉଡାଣ ଭରିବା ସମୟରେ ଏକାଥରେ ଅନେକ ଉପକରଣ ସହ କନେକ୍ଟ ରହିପାରିବେ । ଧିରେ ଧିରେ ନିଜ ଅନ୍ୟ ବିମାନରେ ମଧ୍ୟ ଏହି ସେବା ଆରମ୍ଭ ହେବ ବୋଲି ଏୟାର ଇଣ୍ଡିଆ ସୂଚନା ଦେଇଛି ।
