ସମାଜ ଡିଜିଟାଲ ଡେସ୍କ: କଳାହାଣ୍ଡି ଜିଲା ପାସ୍ତିଗୁଡ଼ା ନିକଟରେ ଶନିବାର ସକାଳେ ଏକ ଭୟାବହ ସଡ଼କ ଦୁର୍ଘଟଣା ଘଟିଛି। ଦୁଇଟି ଟ୍ରକ ପରସ୍ପର ସହ ମୁହାଁମୁହିଁ ଧକ୍କା ହେବା ପରେ ଜଳିଯାଇଛି। ଗୋଟିଏ ଟ୍ରକର ଡ୍ରାଇଭର ନିଆଁରେ ଜୀବନ୍ତ ଦଗ୍ଧ ହୋଇଯାଇଛନ୍ତି।
ସୂଚନା ଅନୁସାରେ, ଏକ କୋଇଲା ଟ୍ରକ ସହିତ ଅନ୍ୟ ଏକ ଚାଉଳ ବୋଝେଇ ଟ୍ରକ ମୁହାଁମୁହିଁ ଧକ୍କା ହୋଇଥିଲା। ଦୁର୍ଘଟଣା ଏତେ ଭୟଙ୍କର ଥିଲା ଯେ, ତୁରନ୍ତ ଟ୍ରକ ଦୁଇଟିରେ ନିଆଁ ଲାଗି ଯାଇଥିଲା। କୋଇଲା ବୋଝେଇ ଟ୍ରକଟି ଜଳିଯିବା ସହିତ ସେଥିରେ ଥିବା ଡ୍ରାଇଭର ବି ନିଆଁରେ ପୋଡ଼ିହୋଇ ପ୍ରାଣ ହରାଇଛନ୍ତି। ଅନ୍ୟ ଟ୍ରକ ଡ୍ରାଇଭରଙ୍କ ସମ୍ପର୍କରେ ସୂଚନା ମିଳିନାହିଁ। ଦୁର୍ଘଟଣା ପରେ ସ୍ଥାନୀୟ ଲୋକେ ଅଗ୍ନିଶମ କେନ୍ଦ୍ରକୁ ଫୋନ କରିଥିଲେ। ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିବାକୁ ଉଦ୍ୟମ କରିଥିଲେ।
