ନୂଆଦିଲ୍ଲୀ : ମହାରାଷ୍ଟ୍ରର ଲୋକପ୍ରିୟ ନେତା ତଥା ଶିବସେନାର ପ୍ରତିଷ୍ଠାତା ବାଲ ଠାକରେଙ୍କ ଜୀବନୀ ଉପରେ ଆଧାରିତ ଚଳଚ୍ଚିତ୍ର ‘ଠାକରେ’ ଶୁକ୍ରବାର(୨୫ ଜାନୁଆରୀ) ସକାଳ ୪.୧୫ରେ ମୁକ୍ତିଲାଭ କରିଛି। ବଲିଉଡ଼ର ଏହା ପ୍ରଥମ ଚଳଚ୍ଚିତ୍ର ଯାହାକୁ ଏତେ ସକାଳୁ ମୁକ୍ତିଲାଭ କରା ଯାଇଛି। ଅଭିଜିତ୍ ପାନସେଙ୍କ ନିର୍ଦ୍ଦେଶନାରେ ନିର୍ମିତ ଏହି ଚଳଚ୍ଚିତ୍ରରେ ନବାଜୁଦ୍ଦିନ ସିଦ୍ଦିକୀ ବାଲ ଠାକରେଙ୍କ ଭୂମିକାରେ ଅଭିନୟ କରିଛନ୍ତି। ଟ୍ରେଡ଼୍ ରିପୋର୍ଟ ଅନୁସାରେ, ‘ଠାକରେ’ ପ୍ରଥମ ଦିନରେ ୨.୭୫ ରୁ ୩ କୋଟି ଟଙ୍କାର ଆୟ କରିପାରେ ବୋଲି ଆଶା କରାଯାଉଛି।
ସୂଚନା ଅନୁସାରେ, ଚଳଚ୍ଚିତ୍ରର ବଜେଟ୍ ୨୫ ରୁ ୩୦କୋଟି ଟଙ୍କା ରହିଛି ଓ ଏହାକୁ ପ୍ରାୟ ୧୩୦୦ ପରଦାରେ ମୁକ୍ତିଲାଭ କରାଯାଇଛି। ଚଳଚ୍ଚିତ୍ରଟି ଦୁଇଟି ଭାଷା ତଥା ହିନ୍ଦୀ ଓ ମରାଠୀରେ ମୁକ୍ତିଲାଭ ହୋଇଛି। ଚଳଚ୍ଚିତ୍ରରେ ଅମ୍ରିତା ରାଓ ଠାକରେଙ୍କ ପତ୍ନୀ ମୀନାଙ୍କ ଭୂମିକାରେ ଅଭିନୟ କରିଛନ୍ତି। ଏଥିସହିତ ସୁଧୀର ମିଶ୍ରା ଓ ଅବଦୁଲ କାଦିର ଅମୀନଙ୍କୁ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକାରେ ଦେଖିବାକୁ ମିଳିଛି।
