ରାଜକନିକା: ରାଜକନିକା ବ୍ଲକ ଅନ୍ତର୍ଗତ କଟକ-ଚାନ୍ଦବାଲି ଜାତୀୟ ରାଜପଥ ଭାରିଗଦା ମା’ ଅନ୍ଧାର ଘରଣୀ ମନ୍ଦିର ଛକ ନିକଟରେ ଗୁରୁବାର ସନ୍ଧ୍ୟାରେ ଏକ ସଡ଼କ ଦୁର୍ଘଟଣାରେ ଜଣେ ଯୁବକଙ୍କ ମୃତ୍ୟୁ ଘଟିଥିବାବେଳେ ତାଙ୍କ ସ୍ତ୍ରୀ ଓ ଝିଅ ଗୁରୁତର ଆହତ ହୋଇଛନ୍ତି। ଯୁବକ ଜଣକ ତାଙ୍କ ଶଶୁର ଘରୁ ଫେରୁଥିବାବେଳେ ଏହି ଦୁର୍ଘଟଣା ଘଟିଥିବା ଜଣାପଡିଛି। ଏହାର ପ୍ରତିବାଦରେ ଅଞ୍ଚଳବାସୀ କ୍ଷତିପୂରଣ ଦାବିରେ ଟାୟାର ଜାଳି ରାସ୍ତାରୋକ କରିଛନ୍ତି।
ବରୁଣାଦିଅ ଗାଁର ପ୍ରଭାତ ନାୟକ(୩୫) ଗୁରୁବାର ସନ୍ଧ୍ୟାରେ ତାଙ୍କ ବାଇକ୍ରେ ସ୍ତ୍ରୀ ଓ ଦୁଇ ବର୍ଷର ଝିଅ ସହିତ ଶଶୁର ଘର ଅଛୁତପୁର ଗାଁରୁ ନିଜ ଘରକୁ ଫେରୁଥିଲେ। ଏହି ସମୟରେ କଟକ-ଚାନ୍ଦବାଲି ଜାତୀୟ ରାଜପଥରେ ଚାନ୍ଦବାଲି ପାର୍ଶ୍ବରୁ ଏକ ପିକଅପ ଭ୍ୟାନ (ଓଡି ୨୧ଏମ୨୦୩୧) ପ୍ରଭାତଙ୍କ ବାଇକ୍କୁ ଜୋର୍ରେ ଧକ୍କା ଦେଇଥିଲା। ଘଟଣାସ୍ଥଳରେ ହିଁ ପ୍ରଭାତଙ୍କର ମୃତ୍ୟୁ ଘଟିଥିଲା। ତାଙ୍କ ସ୍ତ୍ରୀ ଓ ଝିଅ ଗୁରୁତର ହୋଇ ସ୍ଥାନୀୟ ଡାକ୍ତରଖାନାରେ ଚିକିତ୍ସାଧୀନ ଅଛନ୍ତି। ଦୁର୍ଘଟଣା ଘଟାଇ ପିକଅପ ଭ୍ୟାନ ଚାଳକ ଗାଡି ନେଇ ଦ୍ରୁତ ଗତିରେ କେନ୍ଦ୍ରାପଡ଼ା ଆଡ଼କୁ ଫେରାର ହୋଇଯାଇଛି।
