ଆଠଗଡ : ଆଠଗଡ ସହରର ରାସରସିକପୁର ସାହିରେ ସାନ ଭାଇ ନିଜ ବଡ ଭାଇକୁ ପଥର ଛେଚି ହତ୍ୟା କରିବା ଭଳି ଏକ ଲୋମହର୍ଷଣକାରୀ ଘଟଣା ଗତ ୨୦୨୩ ଜୁନ ୪ ତାରିଖରେ ଘଟିଥିଲା । ଏହି ମାମଲାର ବିଚାର କରୁଥିବା ଆଠଗଡ ଅତିରିକ୍ତ ଜିଲା ଓ ଦୌରାଜଜ ରାଜକୁମାର ଦାସ ବୁଧବାର ନିଜ ରାୟ ପ୍ରକାଶ କରି ଭାତୃ ହତ୍ୟାକାରୀ ସାନଭାଇକୁ ଆଜୀବନ କାରାଦଣ୍ଡରେ ଦଣ୍ଡିତ କରିଥିବା ଜଣାପଡିଛି । ଘଟଣାର ବିବରଣୀରୁ ପ୍ରକାଶ ଗତ ୪.୬.୨୦୨୪ରେ ଆଠଗଡ ଏନଏସି ଅନ୍ତର୍ଗତ ରାସରସିକପୁର ସାହିର ଜଗନ୍ନାଥ ପ୍ରଧାନ ଅପରାହ୍ନରେ ତାଙ୍କ ଘର ପାଖରେ ଥିବା ସରସ୍ଵତୀ ଶିଶୁମନ୍ଦିର ନିକଟରେ ଏକ ଗଛ ମୂଳେ ବିଶ୍ରାମ ନେଇଥିଲେ । ଏହି ସମୟରେ ପୂର୍ବ ଶତ୍ରୁତାକୁ କେନ୍ଦ୍ର କରି ସାନ ଭାଇ ଟୁକୁନା ପ୍ରଧାନ ଏକ ବଡ ପଥର ତାଙ୍କ ଛାତି ଉପରେ କଚାଡି ଦେବାରୁ ଘଟଣାସ୍ଥଳରେ ହିଁ ଜଗନ୍ନାଥଙ୍କର ମୃତ୍ୟୁ ହୋଇଯାଇଥିଲା ।
ଘଟଣା ସମ୍ପର୍କରେ ଜଗନ୍ନାଥଙ୍କ ପୁଅ ସଞ୍ଜୟ କୁମାର ପ୍ରଧାନ ଆଠଗଡ ଥାନାରେ ଦେଇଥିବା ଏତଲାକୁ ଭିତ୍ତି କରି ପୁଲିସ ଅଭିଯୁକ୍ତ ଟୁକୁନା ପ୍ରଧାନକୁ ଗିରଫ କରିଥିଲେ । ମାମଲାର ବିଚାର ବେଳେ ପୁଲିସର ଅଭିଯୋଗ ଫର୍ଦ୍ଦ, ବୈଜ୍ଞାନିକ ରିପୋର୍ଟ, ସିସିଟିଭି ଫୁଟେଜର ତର୍ଜମା କରିବା ସହିତ ଅତିରିକ୍ତ ପିପି ଶରତ କୁମାର ଦାଶଙ୍କ ବଳିଷ୍ଠ ଯୁକ୍ତିକୁ ଗ୍ରହଣ କରି ଏଡିଜେ ଶ୍ରୀ ଦାସ ଅଭିଯୁକ୍ତ ଟୁକୁନାକୁ ଦୋଷୀ ସାବ୍ୟସ୍ତ କରି ତାଙ୍କ ରାୟ ଶୁଣାଇଥିଲେ । ଆସାମୀ ଟୁକୁନାକୁ ଆଜୀବନ କାରାଦଣ୍ଡ ସହିତ ୨୦ ହଜାର ଟଙ୍କା ଜୋରିମନା ଏବଂ ଅନାଦେୟ ଅଧିକ ଏକ ବର୍ଷ କାରାଦଣ୍ଡ ଭୋଗିବାକୁ ବିଚାରପତି ଶ୍ରୀ ଦାସ ତାଙ୍କ ରାୟରେ ଆଦେଶ ଦେଇଛନ୍ତି । ସରକାରଙ୍କ ପକ୍ଷରୁ ଅତିରିକ୍ତ ପବ୍ଲିକ ପ୍ରୋସେକ୍ୟୁଟର ଶରତ କୁମାର ଦାଶ ମାମଲାଟିକୁ ପରିଚାଳନା କରୁଥିଲେ ।
