ସମାଜ ଡିଜିଟାଲ ଡେସ୍କ: ଭାରତ ସହିତ କାନାଡ଼ାର ସମ୍ପର୍କ ଖରାପ ହେବା ପଛରେ ଦାୟୀ ହେଉଛନ୍ତି କାନାଡ଼ା ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ। ଖଲିସ୍ତାନୀ ଆତଙ୍କବାଦୀମାନେ କାନାଡ଼ା ଗୁଇନ୍ଦା ବିଭାଗର ବଡ଼ ସମ୍ପତ୍ତି। ସେମାନେ କାନାଡ଼ା ଗୁଇନ୍ଦା ସଂସ୍ଥା ପାଇଁ କାର୍ଯ୍ୟ କରୁଛନ୍ତି ବୋଲି କହିଛନ୍ତି କାନାଡ଼ାରେ ଅବସ୍ଥାପିତ ଭାରତୀୟ ଉଚ୍ଚ ଆୟୁକ୍ତ ସଞ୍ଜୟ ବର୍ମା। ଦୁଇଦେଶ ମଧ୍ୟରେ ତିକ୍ତତା ବୃଦ୍ଧି ପାଉଥିବାରୁ ଭାରତ ସରକାର ବର୍ମାଙ୍କ ସମେତ ଅନ୍ୟ ରାଷ୍ଟ୍ରଦୂତମାନଙ୍କୁ କାନାଡ଼ାରୁ ଫେରାଇ ଆଣିବା ପରେ ବର୍ମା ଏହା କହିଛନ୍ତି।
ବର୍ମା କହିଛନ୍ତି, କାନାଡ଼ାରେ ଖଲିସ୍ତାନୀ ଆତଙ୍କବାଦୀମାନଙ୍କୁ ସର୍ବଦା ଉତ୍ସାହିତ କରାଯାଏ। ଏହା ମୁଁ ଅଭିଯୋଗ କରୁଛି। ସେମାନଙ୍କ ମଧ୍ୟରୁ ଅନେକ ଆତଙ୍କବାଦୀ ଏବଂ ବିଚ୍ଛିନ୍ନତାବାଦୀ କାନାଡ଼ା ସିକ୍ୟୁରିଟି ଇଣ୍ଟେଲିଜେନ୍ସ ସର୍ଭିସ(ସିଏସଆଇଏସ)ର ବଡ଼ ସମ୍ପତ୍ତି। ଖଲିସ୍ତାନୀ ଆତଙ୍କୀ ହରଦୀପ ସିଂହ ନିଜ୍ଜାର ହତ୍ୟା ପଛରେ ବର୍ମା ସମ୍ପୃକ୍ତ ଥିବା ନେଇ କାନାଡ଼ା ଅଭିଯୋଗ ଆଣିବା ପରେ ସେ ଏହା କହିଛନ୍ତି।
