ପାଟଣା : ରବିବାର ସକାଳୁ ପାଟଣା ବନାଞ୍ଚଳକୁ ୨୫ ଟିକିଆ ହାତୀପଲ ପ୍ରବେଶ କରିଛନ୍ତି। ଚମ୍ପୁଆ ବନାଞ୍ଚଳ ଇଲାକାରୁ ନିହ୍ନୁଆଁ, ତ୍ରିବିନ୍ଧା ହୋଇ ଏହି ହାତୀପଲ ପାଟଣା ବନାଞ୍ଚଳରେ ପ୍ରବେଶ କରିବା ସହ ରାସ୍ତାରେ ବ୍ୟାପକ ଧାନ ଫସଲ ନଷ୍ଟ କରିଛନ୍ତି। ଆଜି ସକାଳୁ ଏହି ହାତୀପଲ କେନ୍ଦେଇପଶି-ରାଜନଗର ରାସ୍ତାର ମୁରୁସୁଆଁ ନିକଟରେ ରାସ୍ତା ଉପରେ ଚଳାଚଳ କରିବାରୁ କିଛି ସମୟ ଧରି ଏହି ରାସ୍ତାରେ ଯାନବାହାନ ଚଳାଚଳ ବାଧାପ୍ରାପ୍ତ ହୋଇଛି। ଆଜି ଦିନବେଳା ଏହି ହାତୀପଲ କେନ୍ଦେଇପଶି ନିକଟ କାଜୁ ଜଙ୍ଗଲରେ ଡେରା ପକାଇଥିବା ଦେଖିବାକୁ ମିଳିଥିବାବେଳେ ଏହି ହାତୀପଲଙ୍କୁ ଦେଖିବା ପାଇଁ ପ୍ରବଳ ଲୋକ ରୁଣ୍ଡ ହୋଇଥିଲେ। ଲୋକେ ହାତୀପଲଙ୍କୁ ଚିଡାଇବା ସହ ଟେକା ପଥର ଫିଙ୍ଗିବା ଘଟଣା ପରେ ଆଜି ଦିନ ପାଖାପାଖି ୨ଟା ସମୟରେ ପଲରେ ଥିବା ଏକ ଦନ୍ତା ଗୋଡ଼ାଇ ଗୋଡ଼ାଇ ଜଣେ ଯୁବକକୁ ଟେକି କଚାଡି ଦେଇଥିଲା। ଗୁରୁତର ଯୁବକ ଜଣକ ଅଙ୍କୁରା ଗ୍ରାମର ଅକ୍ଷୟ କୁମାର ନାଏକ ବୋଲି ଜଣାପଡିଛି। ପାଟଣା ବନପାଳ ପିଅନ ନାଏକ ଗୁରୁତରଙ୍କୁ ଉଦ୍ଧାର କରି ପାଟଣା ଡାକ୍ତରଖାନାରେ ପ୍ରାଥମିକ ଚିକିତ୍ସା ଯୋଗାଇଦେବା ପରେ ଅଧିକ ଚିକିତ୍ସା ପାଇଁ ତାଙ୍କୁ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଛି। ପାଟଣା ବନାଞ୍ଚଳ ଅଧିକାରୀ ବନବିହାରୀ ସର୍ଦ୍ଦାର ଓ ପାରା କର୍ମଚାରୀ ମାନେ ହାତୀପଲଙ୍କ ଉପରେ ନଜର ରଖିଛନ୍ତି।
Popular Categories
Previous article
Next article