ଗୁରୁଡିଝାଟିଆ: ବ୍ରହ୍ମପୁର ଗାଁରେ ରାତିକରେ ୩ଟି ମନ୍ଦିରରୁ ଚୋରି କରି ଦେବାଦେବୀଙ୍କ ସ୍ୱର୍ଣ୍ଣ ଓ ରୂପା ଅଳଙ୍କାର ଲୁଟିନେଇଥିବା ୨ ଅଭିଯୁକ୍ତଙ୍କୁ ଖୁଣ୍ଟୁଣୀ ପୁଲିସ ଗିରଫ କରି କୋର୍ଟଚାଲାଣ କରିଛି । ଅଭିଯୁକ୍ତଙ୍କଠାରୁ ଚୋରି ଅଳଙ୍କାର ଉଦ୍ଧାର କରାଯାଇଥିବା ବେଳେ ଗୋଟିଏ ବୋଲେରୋ ଓ ଗୋଟିଏ ଟାଟାଏସି ଗାଡି ଜବତ କରାଯାଯାଇଛି। ଏହା ସହିତ ଏକ ଖେଳଣା ବନ୍ଧୁକ ଓ ବ୍ୟବହୃତ ଫୋନକୁ ପୁଲିସ ଜବତ କରିଛି।
ଅଭିଯୁକ୍ତଦ୍ୱୟ ହେଲେ ଖୁଣ୍ଟୁଣୀ ଥାନା ଅନ୍ତର୍ଗତ ବ୍ରହ୍ମପୁର ଗାଁର ଅଜୟ ସାମଲ(୨୩) ଏବଂ ଚୌଦ୍ୱାର ଥାନା ବାଣିପଦା ଗ୍ରାମର ଅର୍ଫାନ ଅଲ୍ଲି(୧୯) । ଗତ ୨ଦିନ ତଳେ ଖୁଣ୍ଟୁଣୀ ଥାନା ଅନ୍ତର୍ଗତ ଅନନ୍ତପୁର ପଞ୍ଚାୟତର ବ୍ରହ୍ମପୁର ଗ୍ରାମର ମା’ ସିଦ୍ଧ୍ନାରାୟଣୀ, ହନୁମାନଜୀ ଓ ଲକ୍ଷ୍ମୀନାରାୟଣଙ୍କ ମନ୍ଦିରରୁ ଦୁର୍ବୃତ୍ତମାନେ ଗେଟ ତାଲା ଭାଙ୍ଗି ସୁନା ମକୁଟ, ଚିତା, ନୋଥ, ଆଖି ଓ ଅନ୍ୟାନ୍ୟ ସ୍ୱର୍ଣ୍ଣ ଅଳଙ୍କାର ଲୁଟିନେଇଥିଲେ । ଏ ସଂପର୍କରେ ଥାନାରେ ଲିଖିତ ଅଭିଯୋଗ ହେବା ପରେ ପୁଲିସ ସାଇଣ୍ଟିଫିକ୍ ଟିମ ସହିତ ତଦନ୍ତ କରିଥିଲା।
