କଳାପଥର: ବାଙ୍କୀ ସ୍ୱୟଂଶାସିତ ମହାବିଦ୍ୟାଳୟ ପରିସରରେ ବୀରାରାଣୀ ଶୁକଦେଈଙ୍କ ୩୩୮ତମ ଜୟନ୍ତୀ ବୁଧବାର ପାଳିତ ହୋଇଯାଇଛି । ଏହି ଅବସରରେ କଲେଜ ପରିସରରେ ସ୍ଥାପିତ ବୀରାରାଣୀଙ୍କ ପୂର୍ଣ୍ଣାୟବ ପ୍ରତିମୂର୍ତ୍ତିରେ ଅଧ୍ୟକ୍ଷ ଡକ୍ଟର ନିରଞ୍ଜନ ମହାନ୍ତି ପୁଷ୍ପମାଲ୍ୟ ପ୍ରଦାନ କରିଥିଲେ । ଖୋର୍ଦ୍ଧା-ବାଙ୍କୀ ଯୁଦ୍ଧରେ ରାଣୀ ଶୁକଦେଈଙ୍କ ସ୍ୱାମୀଙ୍କୁ ଖୋର୍ଦ୍ଧା ସୈନ୍ୟମାନେ ରାତିରେ ଶୋଇଥିବା ଅବସ୍ଥାରେ ହତ୍ୟା କରିଥିଲେ । ପରେ ରାଣୀ ଶୁକଦେଈ ନିଜେ ପ୍ରତିଶୋଧ ନେବାକୁ ଯାଇ ଯୁଦ୍ଧକ୍ଷେତ୍ରକୁ ଅବତୀର୍ଣ୍ଣ ହୋଇ ଖୋର୍ଦ୍ଧା ରାଜାଙ୍କୁ ପରାସ୍ତ କରି ବାଙ୍କୀଗଡ଼କୁ ବନ୍ଦୀ କରି ଆଣିଥିଲେ । କିନ୍ତୁ ରାଣୀ ଶୁକଦେଈ ଦୟା, କ୍ଷମା, ସହନଶୀଳତାର ମୂର୍ତ୍ତିବନ୍ତ ପ୍ରତୀକ ଭାବେ ତାଙ୍କୁ କ୍ଷମା ଦେଇଥିଲେ । ଏହା ହିଁ ବାଙ୍କୀ ରାଣୀଙ୍କର ମହତ୍ତ୍ଵ, ଯାହାକି ସାରା ବିଶ୍ୱରେ ବିରଳ ବୋଲି ଅତିଥିମାନେ ପ୍ରକାଶ କରିଥିଲେ । ବାଙ୍କୀ ରାଜାଙ୍କ ଦାୟାଦ ଡକ୍ଟର ଶୈଳେନ୍ଦ୍ର ଚନ୍ଦ୍ର ଦେଓଙ୍କ ତତ୍ତ୍ୱାବଧାନରେ ଆୟୋଜିତ କାର୍ଯ୍ୟକ୍ରମରେ ବୀରା ରାଣୀ ଶୁକଦେଈ ସ୍ମୃତି ପରିଷଦର ସଂପାଦକ ପ୍ରାଧ୍ୟାପକ ମନୋଜ କୁମାର ମହାପାତ୍ର ଯୋଗଦେଇ ରାଣୀଙ୍କ ଯୁଦ୍ଧ ଇତିହାସ ବର୍ଣ୍ଣନା କରିଥିଲେ । କାର୍ଯ୍ୟକ୍ରମରେ କ୍ୟାପଟେନ୍ ଗୁରୁବାରୀ ସାହୁ, କୁମରବର ପ୍ରଧାନ, ସୁବାସ ଚନ୍ଦ୍ର ପ୍ରହରାଜ ପ୍ରମୁଖ ବହୁ ଅତିଥି ଯୋଗଦେଇ ରାଣୀଙ୍କ ସ୍ମୃତିଚାରଣ କରିଥିଲେ।
Comments are closed.