କଟକ : ଏସ୍ସିବି ମେଡିକାଲ କଲେଜ ଓ ହସ୍ପିଟାଲ ଶନିବାର ମୁରବୀ ଶୂନ୍ୟ ହେବାକୁ ଯାଉଥିବାବେଳେ ସରକାର ମାସେ ହେଲା ଖାଲି ପଡ଼ିଥିବା ଅଧ୍ୟକ୍ଷ ପଦ ପୂରଣ କରିଛନ୍ତି; କିନ୍ତୁ ସଦ୍ୟ ଖାଲି ହୋଇଥିବା ଅଧୀକ୍ଷକ ପଦରେ କାହାକୁ ନିଯୁକ୍ତି ନଦେଇ ଏହାକୁ ଝୁଲାଇ ରଖିଛନ୍ତି। ବରିଷ୍ଠ ସ୍ତ୍ରୀ ଓ ପ୍ରସୂତି ରୋଗ ବିଶେଷଜ୍ଞ ପ୍ରଫେସର ଡାକ୍ତର ଲୁସି ଦାସଙ୍କୁ ଶ୍ରୀରାମଚନ୍ଦ୍ର ଭଞ୍ଜ ମେଡିକାଲ କଲେଜ (ଏସସିବି)ର ଅଧ୍ୟକ୍ଷ ଭାବରେ ନିଯୁକ୍ତି ଦିଆଯାଇଛି। ସ୍ବାସ୍ଥ୍ୟ ବିଭାଗ ପକ୍ଷରୁ ଡାକ୍ତର ଦାସଙ୍କ ନିଯୁକ୍ତି ସଂକ୍ରାନ୍ତ ବିଜ୍ଞପ୍ତି ଶନିବାର ପ୍ରକାଶ ପାଇଛି। ପ୍ରଫେସର ଦାସ ସମ୍ପ୍ରତି ଏସ୍ସିବିରେ କାର୍ଯ୍ୟରତ ଅଛନ୍ତି। ପୂର୍ବରୁ ସେ ଏସ୍ସିବି ମେଡିକାଲ କଲେଜ ଓ ହସ୍ପିଟାଲର ଅଧୀକ୍ଷକ ଭାବେ କାର୍ଯ୍ୟ କରିଥିଲେ। ଗତ ମାସରେ ପ୍ରଫେସର ଡା. ପ୍ରସେନଜିତ୍ ମହାନ୍ତି ଅଧ୍ୟକ୍ଷ ପଦରୁ ଅବସର ନେଇଥିଲେ। ଏସ୍ସିବି ଅଧୀକ୍ଷକ ପ୍ରଫେସର ଡା. ସୁଧାଂଶୁ ମିଶ୍ରଙ୍କୁ ଅତିରିକ୍ତ ଭାବେ ଅଧ୍ୟକ୍ଷ ଦାୟିତ୍ବ ଦିଆଯାଇଥିଲା। ଶନିବାର ପ୍ରଫେସର ଡା. ମିଶ୍ର ଅଧୀକ୍ଷକ ପଦରୁ ଅବସର ନେଇଛନ୍ତି। ତାଙ୍କ ସ୍ଥାନରେ କାହାକୁ ନିଯୁକ୍ତି ଦିଆଯାଇନାହିଁ। ଏହି ପଦ ଅତିରିକ୍ତ ଭାବେ ଡା. ଲୁସି ଦାସଙ୍କୁ ପ୍ରଦାନ କରାଯାଇଛି। ନୂଆ ଅଧୀକ୍ଷକ ନିଯୁକ୍ତି ପର୍ଯ୍ୟନ୍ତ ଡା. ଦାସ ଅସ୍ଥାୟୀ ଭାବରେ ଏହି ଦାୟିତ୍ବ ତୁଲାଇବେ ବୋଲି ସ୍ବାସ୍ଥ୍ୟ ବିଭାଗରୁ ସୂଚନା ମିଳିଛି। ଡା. ମିଶ୍ରଙ୍କ ପୂର୍ବରୁ ଡାକ୍ତର ଦାସ ଏସ୍ସିବି ଅଧୀକ୍ଷକ ଥିଲେ। ଏସ୍ସିବିର ନୂତନ ଅଡିଟୋରିୟମରେ ଶନିବାର ଆୟୋଜିତ ଭବ୍ୟ ସମାରୋହରେ ଡା. ମିଶ୍ରଙ୍କୁ ବିଦାୟ ସମ୍ବର୍ଦ୍ଧନା ଦିଆଯାଇଛି।
Popular Categories
Previous article
Next article